VOV4.Bahnar - De#h char Dak Lak ‘nao tơ mơ\t yua an^h oei hơ dro# ako\m ăn kơ kang [o#, bơ ngai jang kơ de#h char, khu\l jang pơ gang păng khu\l linh pơ v^h pơ văn. An^h ăn oei hơ dro# ako\m pơm tơ\ An^h vei lăng hơ met bơ ngai đei ko\ng (kueng kơ pho# 12, phường Tân An, pơ lei tơm Buôn Ma Thuột).

An^h âu gô sơng io\k dôm bơ ngai ‘no\h j^ kang [o#, bơ ngai jang kơ de#h char, bơ ngai jang pơ gang, khu\l jang pơ v^h pơ văn păng rim khu\l linh nai vang jang lơ\m tơ drong jang tang găn j^ đei ngôi tơ je# hăm bơ ngai đei băt hơ dăh j^ Covid-19 mă lei ư\h kơ đei [o#h j^, jâu đei j^ dăh mă ngôi tơ je# hăm bơ ngai jâu đei j^ Covid-19 (F1, F2) kăl kơ pơm kiơ\ ăn oei hơ dro#.

Hơ dai hăm ‘no\h, tơ\ âu kum jing an^h sơng io\k kang [o# jang pơ gang, bơ ngai jang păng khu\l jang pơ gang nămjang tơ gu\m vang jang tơ drong jang ăn oei hơ dro# tang găn j^ Covid-19 lơ\m pơ lei tơm Buôn Ma Thuột pơ dơ\h ngôi đơ\ng ro\ng kơ jơ ‘năr bơ\ jang vă vei sơ đơ\ng jơ hngơ\m jăn ăn khu\l kang [o# jang pơ gang, tang găn tôch ai hơ mơt kơ tơ po\h j^ ăn tơ pôl.

Đ^ đăng rim bơ ngai đei sơng io\k tơ\ an^h ăn oei hơ dro# gô đei An^h tơm pơ gơ\r khu\l linh de#h char pơ tru\h tơ mam sa, por so\ng kiơ\ hơ găt kơ tă hloi tơ\ an^h păng đei bơ ngai jang pơ gang hơ len lăng jơ hngơ\m pran rim năr.

Thuem: Tơ blơ\