Hơiă pôk pơjao tơdrong tơchơ̆t pơm Bơngai tang măt ăn Việt Nam tơ̆ Ấn Độ, jang hloi tơ̆ teh đak Nepal păng Bhutan; Bơngai tang măt ăn Việt Nam tơ̆ teh đak Bỉ, pơm hloi bơngai tang măt tơ̆ teh đak Luxembourg păng Bơngai tang măt ăn Việt Nam tơ̆ Jơnŭm Châu âu; Bơngai tang măt Việt Nam tơ̆ teh đak Thuỵ Sĩ, pơm hloi bơngai tang măt tơ̆ teh đak Liechtenstein; Bơngai tang măt ăn Việt Nam tơ̆ teh đak Cộng hoà Dân chủ Nhân dân Triều Tiên păng Bơngai tang măt ăn Việt Nam tơ̆ teh đak Kazakhstan, pơm hloi bơngai tang măt tơ̆ Kyrgyzstan, Tajikistan păng Georgia ăn 5 ‘nu bơngai tang măt.

Tổng Bí thư, Kơdră teh đak Tô Lâm pơma hơdăh, ‘nâu jĭ tơdrong tôch hơiă mă lei kŭm jing hơnăp jang tih hăm dôm bơngai tang măt, yoa đe sư ưh lăp dơ̆ng tang ăn teh đak đĕch mă oei jing um rup teh đak, um rup hơdrĕch hơdrung păng athei tơlĕch jang kiơ̆ trong jang tơbôl đơ̆ng Đảng bơ̆n hai, vang tơgop pơjing păng vei lăng teh đak đơ̆ng hrôih, đơ̆ng hơtăih. Tổng Bí thư, Kơdră teh đak Tô Lâm athei, dôm Bơngai tang măt hlôh vao hơdăh hơnăp jang đơ̆ng kơdih, hơnơ̆ng hơtŏk đon rơgei, nuih mơng, jang tơnăp đơ̆ng kơdih, vang tơgop hơnhăk tơdrong pơvei đơ̆ng Việt Nam hăm dôm teh đak roi ‘lơ̆ng, đei yoa păng pran kơjăp.