Tơ̆ jơ sơng pơma dơnuh hăm bơngai tăh hla, Thủ tướng Lê Minh Hưng tơbăt đei bơngai tăh hla pơlei tơm Hải Phòng lui ngeh, pôk pơm bơngai tang măt Quốc hội ‘noh jĭ tơdrong chơt hơiă tih hăm kơ dih Thủ tướng păng dôm Bơngai tang măt Quốc hội. Thủ tướng akhan, ‘Măng hop akŏm mă Mônh Quốc hội jăl XVI đei tơdrong ‘lơ̆ng gĭt kăl, yak mơ̆t lơ̆m jăl jang ‘nao, tơchơ̆t khei ‘năr tơ̆ hơnăp kơnh hơtŏk tơiung teh đak, tơring, lơ̆m noh đei pơlei tơm Hải Phòng. 

Hăm hơnăp jang ‘noh jĭ bơngai chĕp kơ̆l Khŭl teh đak păng jing Bơngai tang măt Quốc hội kơ pơlei tơm Hải Phòng, Thủ tướng pơma hơdăh gô ling lang yak hơdai hăm Đảng bộ, khŭl kơdră păng Kon pơlei pơlei tơm; kŭm hăm đĭ đăng Khŭl kơdră teh đak khŏm pơgơ̆r bơ̆jang kiơ̆ jơnei dôm tơdrong hơgăt hơtŏk tơiung kơ teh đak, lơ̆m noh đei dôm tơdrong tơm, hơnăp jang păng hơpơi ‘meh hơtŏk tơiung kơ pơlei tơm Hải Phòng.