Phường Phú Thuỷ, dêh char Lâm Đồng đei pơjing ‘moi kiơ̆ đơ̆ng tơmât hơdai 3 phường, đei: Phú Thủy, Thanh Hải păng Phú Hài găh dêh char Bình Thuận so. Chih hơdăh tơdrong tơplih hăm kơmăy sô̆ jĭ tơdrong jang tơm, kăl jang mă pran, đơ̆ng rŏng kơ bơ̆ jang kiơ̆ trong Khul kơdră pơgơ̆r tơring 2 tăl, phường Phú Thuỷ hlôi pơjing hrĕnh Grŭp jang kiơ̆ kơmăy păng bơ̆ jang tơgŭm mưh chă pơm hla ar; pơjing 23 Grŭp tơgŭm jang kơmăy ăn tơpôl đei 130 ‘nu păng pơjing trong Pơih lăm Pơtho ăn kon pơlei hok găh kơmăy sô̆.

‘Nhŏng Phan Anh Tiến, Bí thư Đoàn phường Phú Thuỷ, tơroi, hơtŏk đon tơnăp hơnơ̆ng năm hơdrol đơ̆ng sơnăm mơlôh, hlŏh 4.400 ‘nu đoàn viên druh dăm tơ̆ phường yak hơdrol chă pơtho tơƀôh găh kơmăy sô̆, vang tơgŭm ăn kon pơlei “xut pơđĭ tơdrong ưh kơbăt yoa kơmăy kơmŏk”: “Đoàn phường hơnơ̆ng tơroi tơbăt, pơtâp pơhrăm tơplih hăm kơmăy sô̆ ăn đe đoàn viên druh dăm. Dôm chi đoàn năm truh tơ̆ rim hnam tơgŭm ăn đe mih ma duch nă, mă loi jĭ bơngai kră păng bơngai jo jăn băt yoa điên thoăi rơgei, chih pơjing VNeID tăl 2. Băt trong nôp hô sơ trư̆k tuyê̆n lơ̆m kơmăy. Mưh pơtho ăn bơngai kră tam mă gơ̆h yoa kơmăy kơmŏk ‘nao athei pơtho lơ ‘măng, dar deh vă đe sư băt. Lơ̆m giĕng Đoàn phường ăn khul jur jang tơ̆ Anih pơm hla ar ăn tơpôl vang tơgŭm ăn kon pơlei pơm hla ar”. 

Vă jê̆ 10 khei âu ki kŭm hăm vei sơđơ̆ng tơdrong bơ̆ jang đơ̆ng Khul kơdră pơgơ̆r, Anih chĕp kơ̆l Đảng phường Phú Thuỷ, dêh char Lâm Đồng oei akŏm jơhngâm bơ̆ jang tơplih hăm kơmăy sô̆ hrĕnh ƀiơ̆, đei yoa ƀiơ̆ păng jê̆ kon pơlei ƀiơ̆. Dôm trong jang: “Tơdrong kla jên ưh đei yoa jên măt”, ‘măng bơ̆ jang tơm 60 măng năr pơm ƀơk Hơnăn định danh điện tư tơklep hăm trong jang “1 ‘nu kon pơlei – Mĭnh hơnăn kơsô̆”; khei jang tơm 90 măng năr chih tơmât, pơm rơgog kơsô̆ chih răk găh teh tơ̆ phường; 90 măng năr chih tơmât hơdăh găh tơdrong iŏk unh om; chih tơmât dôm tơdrong tơroi kăl găh tang găn, pĭt unh xa… vang tơgop pơm hơtŏk tơdrong đei yoa mưh vei lăng teh đak păng pơm lăp  đon kon pơlei, anih tĕch mơdro.

Ƀok Nguyễn Hữu Thông, Bí thư Đảng phường Phú Thuỷ, pơma hơdăh, Anih chĕp kơ̆l Đảng phường chih hơdăh, tơplih hăm kơmăy sô̆ păng iŏk yoa kơmăy kơmŏk roi tơbăt vă bơ̆ jang đơ̆ng khul kơdră pơgơ̆r tơring ‘nŏh jĭ tơdrong hơgăt tôch gĭt kăl vă hơlen năng tơdrong gơ̆h hơgei mưh chep kơ̆l pơgơ̆r đơ̆ng khul kơdră  tơring kŭm nhen rim kăn ƀô̆, đảng viên:

“Tơdrong iŏk đei đơ̆ng tơplih hăm kơmăy sô̆, jang kiơ̆ kơmăy kơmŏk mưh chĕp kơ̆l pơgơ̆r đơ̆ng Phú Thuỷ ‘nŏh tôch hơiă. Đĭ đăng kăn ƀô̆, bơngai jang ăn teh đak iok yoa kơmăy vei lăng hăm điên tư, bơ̆ jang hăm kơmăy sô̆ ngăl. Kơsô̆ pơm hla ar trư̆k tuyê̆n tơ̆ phường loi 70%, 1,2 tơdrong jang oei kơjung hlŏh dơ̆ng. Lơ̆m sơnăm 2025 tơdrong hơmet ming trong pơm hla ar tơ̆ phường Phú Thuỷ dơ̆ng mă 3 lơ̆m 124 xăh, phường, tơring gĭt kăl. Phường dar deh iŏk yoa bơ̆ jang hăm kơmăy sô̆ păng chih hơmet tôm tơdrong vă yoa atŭm, hơtŏk hrĕnh tơdrong bơ̆ jang, pơvih hăm kơmăy trư̆k tuyê̆n, pơjing tơdrong ‘lơ̆ng, hiôk hian ăn kon pơlei păng anih tĕch mơdro”.

Chih iŏk tơ̆ lơ xăh, phường kơ dêh char Lâm Đồng ăn ƀôh, tơplih hăm kơmăy sô̆ oei dar deh pơm tơplih trong chĕp kơ̆l pơgơ̆r. Mă loi, ƀât mă tơdrong jang đei akŏm roi lơ tơ̆ tơring, tơplih hăm kơmăy sô̆ jing “’long tưk” gĭt kăl. Gơnơm jang hăm kơmăy kơmŏk, kăn ƀô̆, bơngai jang tơ̆ xăh sek tơlang rim tơdrong hrĕnh ƀiơ̆, trŏ ƀiơ̆, atŭm hăm ‘nŏh hơtŏk tơdrong jang hơdoi, roi tơbăt rim kơsô̆ đei chih răk hăm dêh char tôch tơtom. Vă kon pơlei tơ̆ tơring tơring, tơring hơtăih yăih, tơring pơmat tat kơ dêh char ưh đei hŭt hơchăng lê tơ̆ rŏng mưh bơ̆ jang hăm kơmăy sô̆, khul kăn ƀô̆ tơ̆ tơring kơ dêh char Lâm Đồng vă iŏk jang tơdrong gleh ƀiơ̆.

Ƀok Đặng Thiện Viên, Phŏ Kơdră vei lăng kon pơlei xăh Liên Hương, dêh char Lâm Đồng, ăn tơbăt: “Tơring Liên Hương jang chŭn mir ‘noh lơ, kon pơlei đa pơm hla ar chih hăm ti ngăl. Dang ei kăn ƀô̆, bơngai jang ăn teh đak tơ̆ xăh mưh pơm hla ar ‘nŏh pơm hloi hăm hla ar chih păng pơtho tơƀôh hloi trong iok yoa kơmăy sô̆ vă bơ̆ jang hăm kơmăy kơmŏk kiơ̆ trong tơlĕch jang đơ̆ng dêh char”.

Hlôh vao kơjăp Tơdrong tơchơ̆t 57 đơ̆ng Anih tơm Chinh trĭ, Tơdrong tơchơ̆t kơsô̆ 71 đơ̆ng khul kơdră teh đak găh atŏk tơiung khoa hŏk, kơmăy kơmŏk, tơplih ‘nao rơgei păng tơplih hăm kơmăy sô̆ kơ teh đak, dêh char Lâm Đồng oei hơtŏk pran tơdrong tơplih hăm kơmăy sô̆ kiơ̆ tơdrong jang đơ̆ng 2026-2030. Lơ̆m noh, chih hơdăh Anih jang kơmăy sô̆ păng rim tơdrong đei chih răk jĭ tơdrong tôch git kăl; akŏm jơhngâm chih răk rim tơdrong lơ̆m kơmăy kơmŏk ‘nao, hrơ̆ch ‘lơ̆ng; chih tơroi “trŏ, tôm, rơđăh rơđong, drơ̆ng pôm nơ̆r, iŏk yoa atŭm” vă pơtruh ăn đei yoa ‘lơ̆ng đơ̆ng dôm anih jang…

Ƀok Võ Thành Công, Kơdră vei lăng Anih jang Khoa hŏk păng kơmăy kơmŏk dêh char Lâm Đồng, ăn tơbăt: “Anih jang oei tơlĕch tơdrong chih răk lơ̆m kơmăy vă yoa atŭm. Tơdrong jang ‘nâu tôch tih, ƀơm truh tơ̆ 11 anih jang kơpal. Đơ̆ng rŏng kơ tơdrong jang đei jang đang gô pơjing đei kơsô̆ chih răk ‘lơ̆ng ăn dêh char, lơ̆m noh gô đei lơ kơmăy phần mềm tơ̆ dôm anih jang kơpal chih hơtŏk vă iŏk yoa atŭm, pơvih ăn tơdrong chĕp kơ̆l, pơgơ̆r bơ̆ jang”.

Hăm dôm tơdrong adrin tơplih hăm kơmăy sô̆, truh dang ei 100% tơdrong pơm hla ar tơ̆ dêh char păng tơ̆ xăh tơ̆ Lâm Đồng hlôi đei iŏk pơm, pơdreu hrơ̆ch ‘lơ̆ng lơ̆m dêh char. Kơsô̆ hla ar pơm hăm kơmăy, tơdrong pơm đang hla ar đei vă jê̆ 90%. Tơdrong iŏk yoa dơ̆ng rim tơdrong đei chih tơroi, chih hăm kơmăy sô̆ đei dang 93%. Lâm Đồng hlôi đei hlŏh 14.000 chư kĭ hăm kơmăy sô̆ vă yoa ăn tơdrong bơ̆ jang. Năm truh đon pơhnŏng pơjing khul kơdră bơ̆ jang chĕp kơ̆l pơgơ̆r hăm kơmăy sô̆, jang muk drăm hăm kơmay sô̆, tơring oei hơnơ̆ng tơlĕch jên, răt hơmet kơmăy kơmŏk, atŭm hăm ‘nŏh hơtŏk tơdrong pơtho pơhrăm ming dơ̆ng ăn khul kăn ƀô̆, bơngai jang ăn teh đak vă hơtŏk hlŏh dơ̆ng tơdrong ‘lơ̆ng mưh pơvih ăn kon pơlei păng anih tĕch mơdro./.