Thủ tướng hôn bơnê kơtang dôm tơdrong hơdrin, kơrŭn đĭ ai păng dôm tơdrong iŏk đei jơnei hơ iă kơ Hơnih tơm vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ iŏk đei lơ̆m jang kiơ̆ tơdrong jang, trong pơprŏ bơ̆ jang păng tơdrong jang đei pơjao; mă kăl ‘noh iung jang pơchoh trong, tơlĕch ăn pơjing, tơlĕch jang kiơ̆ Tơdrong tơchơ̆t kơsô̆ 80 đơ̆ng Hơnih tơm Chinh trĭ păng pơtruh ăn ‘Măng hop akom mă blŭng Kuô̆k hô̆i jăl XVI pơjing tơdrong Tơchơ̆t găh atŏk tơ iung tơdrong oei sa joăt joe ‘lơ̆ng rŏ. Khei năr kơnh, Thủ tướng akhan kăl lăng kơjăp hloh dơ̆ng tơ iung pơjing Đảng ƀô̆ rơgoh ‘lơ̆ng, pran kơtang tôm tong; atŏk kơtang tơdrong jang tơnăp kơ bơngai chĕp kơ̆l rim hơnih jang. Thủ tướng jei athei tơlĕch jang kơtang Tơdrong jang tơm teh đak găh oei sa joăt joe ‘lơ̆ng rŏ, kiơ̆ yok trong tơlĕch ăn, tơdrong pơkăp, dôm bơngai đei iŏk yoa sa hơpăh. Pơjing hơyak pran kơtang lơ̆m atŏk kơtang pơhrăm tơplŏng kơdou; tơmơ̆t jên jang dôm tơdrong kăl. Hơmet ming pơ ‘lơ̆ng, atŏk bơ̆ jang tơnăp kĕ pơjei, ba tơdrong jang tơmang pơhiơ̆ tơpă jing hơnih jang mŭk drăm tơm dơnơm.