Kơdră chĕp pơgơ̆r Hơnih vei lăng kon pơlei dêh char Lâm Đồng Hồ Văn Mười ‘nao dăr lăng, băt hơdăh rim tơdrong vă jang păng athei tơngla tơmơt jên jang, hơnih iŏk ming man atŏk kơ tang iung jang. Khul hlôi năm ngôi păng bơ̆ jang hăm Công ty TNHH Luyện kim Trần Hồng Quân (tơring Nhân Cơ) vă băt hơdăh tơdrong iung jang ming man kơ hnam kmăi Điện phân nhôm Đắk Nông. Tơdrong vă jang đei kon jên tơmơ̆t jang vă jê̆ 18.500 ti hlak jên, mĭnh sơnăm pơm tơlĕch đei dang 450.000 tân nhôm. Hnam kmăi ou jĭ hơnih pơm tơlĕch pơ ‘lơ̆ng tuch luch kơ tơdrong jang sir iŏk bô xít - pơm tơlĕch alumin păng pơm tơlech nhôm mam rim kơ loăi. Tơchĕng hơlou, lơ̆m jăl II sơnăm ou gô jang keh đang tơmơ̆t jên jang, tơmơ̆t iŏk yoa hăm 1 sơnăm pơm tơlĕch đei 150.000 tân; truh jăl III/2027 pơm tơlĕch đei ƀlep hăm trong tơlĕch ăn. Lăp đơ̆ng rŏng dăr lăng, Kơdră chĕp pơgơ̆r Hơnih vei lăng kon pơlei dêh char Lâm Đồng Hồ Văn Mười pơma hơdăh, ‘nou jĭ hnam kmăi pơm tơlĕch mam mă blŭng kơ Việt Nam, kăl lăng kơjăp truh bơ̆ jang sơđơ̆ng, mă kăl găh ŭnh hơyuh, adoi athei rim hơnih bơ̆ jang iung jang hơdoi kơjăp hơmet pơ ‘lơ̆ng tơnap tap ăn hơnih mơdro sa.

Anih vei lăng kon pơlei dêh char Lâm Đồng kŭm ‘nao hop akŏm hơlen lăng trong jang tơmơ̆t jên jang kơ teh đak jăl jang 2026–2030 hăm 24 tơdrong jang hlôi drơ̆ng nơ̆r. Dêh char athei jăh pơm đang hla ar, jăh tơlĕch jang, tŭn hrĕnh tơlĕch jên jang; Anih vei lăng jên hu kơchăng hơmet ăn jên jang, rim tơring khŏm iŏk pơ ‘ngoăih teh. Mă lei, tơlĕch jên jang tơmơ̆t jên jang teh đak kơ Lâm Đồng tŏk bŏk tôch kơ tŏ sĕt, tam mă iŏk đei 4% trong tơlĕch jang. Akŏm jên jang sơnăm 2026 đei pơjao vă jê̆ 15.800 ti hlak jên mă lei đĭ jăl khei mă I ‘nao tơlĕch jên jang dang 578 ti hlak jên. Tơdrong tơm pơm ăn găh lơ ‘noh jĭ tơhlăk găh iŏk pơ ‘ngoăih teh, tơdrong jang đơ̆ng bơngai iŏk jang tam mă ‘lơ̆ng, pơm hla ar pơmat tat păng hơnăp jang đơ̆ng 1,2 tơ ‘ngla tơmơ̆t jên jang tam mă lơ. Phŏ Kơdră Anih vei lăng kon pơlei dêh char Lâm Đồng Nguyễn Ngọc Phúc tơbăt dêh char tŏk bŏk akŏm hơmet pơ ‘lơ̆ng rim tơdrong tơhlăk, mă kăl ‘noh jĭ khôi luơ̆t tơmơ̆t jên jang teh đak.

"Kăl athei băt akhan lơ̆m khei ‘năr âu bơ̆n athei hơmet pơ ‘lơ̆ng tơdrong tơhlăk hơdăh hơyơ. Tơdăh đăng xăng đak dâu tŏk ‘noh bơ̆n akŏm lơ̆m hơmet pơ ‘lơ̆ng hla ar trŏ luơ̆t găh tơmơ̆t jên jang teh đak hơdrol, đang kơ ‘noh jĭ dôm tơdrong jang mă gơh jang hloi. Pơtih gia nhen, mưh drơ̆ng nơ̆r mĭnh xăh ‘noh 3 tơdrong jang păng jang hloi vă hơtŏk jên tơmơ̆t jang kơ teh đak, mă lei athei rơih dôm tơdrong jang đei ƀơm ‘lơ̆ng hloi, iŏk tơmơ̆t yua hloi, dôm tơdrong jang ưh kơ athei iŏk pơ ‘ngoăih teh”.