Anih vei lăng kon pơlei dêh char Gia Lai ‘nao pơgơ̆r hop akŏm hơmet pơ ‘lơ̆ng tơdrong tơhlăk iŏk pơ ‘ngoăih teh tơdrong jang pơm trong gre kơdâu hrĕnh Quy Nhơn – Pleiku hơtăih 125 km. Tơdrong jang 1 hlôi pơjao 65% teh. Dêh char tơlĕch jang 13 hơnih oei hle ăn kơ hloh 620 ŭnh hnam kon pơlei. Mă lei, kơjă hrŭ ‘mong tŏ sĕt păng tơhlăk pôk rĭ anih jang kăl tŏk bŏk ƀơm ưh kơ ‘lơ̆ng truh tơdrong jang. Phŏ Kơdră Anih vei lăng kon pơlei dêh char Nguyễn Tự Công Hoàng athei:

“Hrŭ ‘mong teh choh jang sa ‘noh athei hơlen lăng tơm a mă trŏ. ‘Meh jang tơdrong ‘nâu ‘noh pơđĭ khŭl jang chĭnh trĭ đơ̆ng pơlei pơla tơ̆ kơpal athei roi tơbăt, krao hơvơn, băt hơdăh kơtơ̆ng ang, roi tơbăt, apĭnh đơ̆ng kon pơlei, vă hơmet pơ ‘lơ̆ng hloi đơ̆ng tơring. Hơdrin tơdrong jang 1 athei jang hrĕnh vei sơđơ̆ng ‘lơ̆ng hơdai hăm tơdrong jang 1 păng 3. Hrŭ ‘mong teh choh jang sa ‘noh ‘năr 30/4 đang”.

Hơdai hăm ‘noh, Gia Lai sơkơ̆t hơdăh lơ tơdrong jang; jang đang trong gơlang mŭk drăm păh Hơlĕch lơ̆m khei 6/2026; dôm trong tơƀưh lơ tơring jang đang lơ̆m sơnăm; iŏk teh pơm trong gre kơdâu hrĕnh đang lơ̆m khei 4/2026. Lơ tơdrong jang pơm dơnâu đak, jang pơgang, joh ayŏ, anih kơdrơ̆m kŭm đei tơlĕch jang păng jang kiơ̆ trong hơdăh. Dêh char tơlĕch ăn tơdrong hơgăt tơlĕch jên jang 100% kon jên sơnăm 2026, athei vei lăng kiơ̆ tơdrong pơkăp “6 rơđăh”, tơklep hơnăp kơdih.