Tơ̆ hnam nhap Tổng Bí thư Nguyễn Văn Linh, Tổng Bí thư, Kơdră chĕp pơgơ̆r teh đak Tô Lâm pơma tơbăt jơhngơ̆m đon kŭp yom, hôm bơnê hăm Kơdră chĕp pơgơ̆r gơh hơgei kơ chăl tơplih ‘nao, bơngai hlôi atŭm hăm Trung ương Đảng tơlĕch ăn păng pơgơ̆r jang kiơ̆ trong bơ̆ jang trŏ lăp, tơgop ba teh đak yak hloh tơnap tap, roi năr roi atŏk tơ iung.

Khul hlôi truh soh hlôt nhang ƀlŏk hơdơ̆r nhap Kơdră chĕp pơgơ̆r Jơnŭm chĕp pơgơ̆r Teh đak Võ Chí Công, kơdră chĕp pơgơ̆r tơpăt ‘lơ̆ng gơh hơgei, đei lơ tơdrong tơgop lơ̆m pơjing đei pơm tơm kơ dih, teh đak rơngei keh kong. Khul hlôi truh soh hlôt nhang ƀlŏk hơdơ̆r tơ̆ hnam nhap Kơdră chĕp pơgơ̆r Jơnŭm chĕp pơgơ̆r Kơdră dơnơm Phạm Hùng păng nhap Tổng Bí thư Lê Duẩn, tơbăt jơhngơ̆m ƀlŏk hơdơ̆r tôch bach, adoi apĭnh jet gia pơma dơnuh hăm ŭnh hnam. Khul jei hlôi ƀlŏk hơdơ̆r kŭp yom hăm Thủ tướng Võ Văn Kiệt păng Đại tướng, Kơdră chĕp pơgơ̆r teh đak Lê Đức Anh. Tơdrong bơ̆ jang ou tơgop pôk pơ ư hôn bơnê rim jơhnơr hơdrol, pơtho tơbăt tơdrong joăt joe ‘mêm kơ eng teh đak, hơmet pơ ‘lơ̆ng hơnăp jang lơ̆m tơ iung pơjing păng vei lăng teh đak.