VOV4.Bahnar – Dôm dêh char Tây Nguyên pơma atŭm, păng Đăk Lăk pơma adrô̆ hlôi yak ăh pơyan 'mi. Mă lei tơ̆ xăh Ea Siên, thĭ xăh Buôn Hồ, dêh char Đăk Lăk duh tam mă đei 'mi, pơnơ̆ đak noh hrơ̆ och, pơm ăn jê̆ 2.000 ha 'long pơtăm ƀơm răm kơtang păng hloh 1.400 unh hnam kon pơlei ưh đei đak xŏ nhă.

Pơgar ka phê xă hloh 1 ha tŏk bŏk lơ̆m xơnăm oei pĕ yua kơ unh hnam ƀok Hứa Văn Quân, tơ̆ xăh Ea Siên, thĭ xăh  Buôn Hồ tŏk bŏk oei tơjră hăm tô̆ pơđang kơtang. Ka phê tŏk oei rong plei tơbŏ dăh athei jơk ƀlĭk mă lei xơdrai hla jô honh, plei noh kro hơlŭng pơđĭ. Ƀok Hứa Văn Quân ăn tơbăt, mưh lơ̆m minh ƀar năr dơ̆ng mă ưh đei 'mi, pơgar 'long ưh đei ruih đak noh tơdrong hiong răm jor kơ đei: “Khei năr âu nhen dôm xơnăm adrol ki ưh đei tô̆ phang noh ka phê plei tih bơih, mă lei yuơ tô̆ pơđang noh tơm ưh kơ giơ̆ng pơm ăn plei iĕ hloh kơ dôm xơnăm adrol. Tô̆ pơđang oei pơm ăn kơ hla tơm ka phê kro honh, plei pơda ruh lơ, phŏ noh lôch tơm hloi” 

          Duh nhen noh, pơgar ka phê pơtăm hrau hăm hơƀo lai xă 1 ha 4 sao kơ unh hnam yă Siu H’Niê, tơ̆ thôn 2B, xăh Ea Siên, thĭ xăh Buôn Hồ duh oei tơjră hăm tô̆ pơđang hlăm. Yă Siu H’Niê tơroi, xơnăm xơ̆ hơgăt âu đei yua hloh 4 tâ̆n ka phê klong, 5 tâ̆n hơƀo, mă lei xơnăm âu tô̆ phang pơm ăn ka phê kro honh, hơƀo pơtăm hrau noh hlôi lôch. Tơdrong iŏk yua kơ unh hnam yă Siu H’ Niê mă tơm gơnơm lơ̆m 1 ha 4 sao teh âu, chŏng mă dang ei tô̆ phang pơrăm đĭ bơih: “Tô̆ kơtang thoi âu hơƀo lôch pơđĭ bơih, xơnăm xơ̆ đei yua 20 trĭu hlj noh xơnăm âu hipng pơgoh, oei pơgar ka phê duh kro honh, hơlŭng plei. Dơnâu đak noh kro rơđăng pơđĭ. Mưh minh ƀar năr dơ̆ng mă ưh đei 'mi tih noh plei gô tơjur hơdăh hloi. Tô̆ phang kơtang pơrăm truh tơdrong pơyua”

          Tơdrong hơlen đơ̆ng Anih vei lăng kon pơlei xăh Ea Siên ăn ƀôh, pơyan puih phang xơnăm 2021, jâ̆p xăh đei jê̆ 2.000 ha hơdrĕch 'long pơtăm; lơ̆m noh 1.500 ha 'long pơtăm đunh xơnăm noh ka phê, tiu, măk ka, jrang; oei dôm to noh hloh 500 ha noh 'long tŏ xĕt năr nhen ƀa hơƀo, tơh păng kơmưt.

          Kiơ̆ kơ ƀok Nguyễn Quốc Cường – Kơdră Anih vei lăng kon pơlei xăh Ea Siên, tô̆ phang lơ̆m tơring hlôi ƀôh lơ xơnăm kơ âu, mă hăt noh khei tơm ăh pơyan phang. Mă lei, tơdrong mă tô̆ pơđang ăh tong anê̆ khei 'mi nhen dang ei noh hŭi kơ đei. Ƀok Cường tơroi, yuơ teh đak mŏng ưh gan đei, đak 'măn choh jang xa păng đak xŏ nhă mă tơm noh đơ̆ng 2 dơnâu đak Ea Mích, Ea B’Lang păng dôm dơnâu đak krong đak glung iĕ. Tơdrong tam mă đei 'mi tih pơm ăn dôm dơnâu đak âu hrơ̆ och. Hloh kơ noh dơ̆ng, dôm dơnâu pơnơ̆ noh dơnâu Ea Mích păng Ea B’lang lơ xơnăm kơ âu tam mă đei kôch hơmet, noh tơdrong kong đak ưh đei nhen adrol ki pơm ăn đak hrơ̆ och hloh. Tô̆ pơđang ưh adrô̆ pơrăm hăm jê̆ 2.000 ha 'long pơtăm, mă oei pơm ăn hloh 7.500 măt bơngai lơ̆m xăh ưh kơ đei đak xŏ nhă hloi: “Tô̆ pơđang lang xă tơ̆ xăh hlôi pơm tơnap ăn tơdrong ruih đak ăn 'long pơtăm păng đak xŏ nhă. Găh đak xŏ nhă noh Anih vei lăng kon pơlei xăh pơtruh nơ̆r hăm thĭ xăh Buôn Hồ man dơnâu đak akŏm ƀôm đơ̆ng dơnâu đak Krông Búk Hạ vih tơ̆ dơnâu mong tơ̆ thôn 2A vă axong đak xŏ nhă ăn kon pơlei tơ̆ dôm thôn; găh đak ruih ăn 'long pơtăm noh xăh duh xơkơ̆t dôm trong jang chă kôih hơmet 2 dơnâu mong đak Ea Bích păng Ea M’lang dăh mă chă man dôm dơnâu đak nai vă 'măn ăn tơdrong ruih đak ăn 'long pơtăm tơ̆ tơring”.

          Tô̆ pơđang đei ƀôh ăh tong anê̆ pơyan 'mi tơbang hơyuh tô̆ 'mi roi năr roi kơnê̆, tơnap kơ tang găn tơ̆ Tây Nguyên.

Lan chih păng pơre nơ̆r