VOV4.Bahnar – Năr 22/11, tơ̆ Anih gru grua kăp gĭt Hnam phak Buôn Ma Thuột, Anih jang Kơpal dêh char, Anih vei lăng kon pơlei, Anih jang Măt trâ̆n tôh kuôk Việt Nam dêh char Đăk Lăk hlôi pơm lêh plang hlôt nhang ƀlŏk tơbăt 81 xơnăm Năr tơ iung pơjing Đảng ƀô̆ dêh char Đăk Lăk (23-11-1940 – 23-11-2021).

Tơ̆ lêh ƀlŏk tơbăt, lơ bơngai tang măt atŭm băl vih tơbăt kơ hnưr erih nuih mơng kơ Đảng ƀô̆ dêh char Đăk Lăk lơ̆m 81 xơnăm đei tơ iung pơjing, hơtŏk păng vơ̆ pran. Đơ̆ng jê̆ đĭ xơnăm 1940, Chi ƀô̆ Đảng cộng sản mă blŭng tơ̆ Đăk Lăk đei tơ iung pơjing tơ̆ Hnam phak Buôn Ma Thuột, truh dang ei Đảng ƀô̆ Đăk Lăk đei 20 đảng ƀô̆ iơ iĕ, hloh 700 anih jang đảng tơ̆ tơring, hăm hloh 83 rơbâu đảng viên. Tơ̆ lêh plang hlôt nhan ƀlŏk tơbăt 81 xơnăm Năr tơ iung pơjing Chi ƀô̆ Đảng mă blŭng tơ̆ Đăk Lăk, tang măt ăn Khul Kơpal Đảng ƀô̆ păng kon pơlei dôm hơdrung bơngai lơ̆m dêh char tơbang tơdrong khŏm mă chĕp vei tơdrong juăt jue nuih mơng, pơtoi tơplih kơtang găh đon kơchĕng păng pơm jang, tơ iung mŭk drăm, tơdrong pran, hơtŏk mŭk drăm – tơpôl, tơ iung pơjing Đăk Lăk roi năr roi pơdrơ̆ng 'lơ̆ng rŏ, ƀenh kơ um ai joh ayŏ kơdih.

Lan chih păng pơre nơ̆r