VOV4.Bahnar - Dơnŏ anĭh vei lăng kon pơlei apŭng Krông Pach, dêh char Dak Lăk hlôi tơchơ̆t ăn pơdơ̆h bơ̆ jang hăm Kơdră chĕp pơgơ̆r Dơnŏ anĭh vei lăng kon pơlei tơring Vụ Bổn kơ yuơ lê̆ jĭ hơbŭh Covid-19 tơpŏh lang să lơ̆m kon pơlei. Kiơ̆ kơ ‘nŏh, ƀok Trần Văn Sáu, Kơdră chĕp pơgơ̆r Dơnŏ anĭh vei lăng kon pơlei tơring Vụ Bổn, apŭng Krông Pach, dêh char Dak Lăk ăn pơdơ̆h bơ̆ jang lơ̆m 15 năr, jô̆ đơ̆ng năr 10/8 trŭh năr 24/8/2021. Tơdrong tơm mă Dơnŏ anĭh vei lăng kon pơlei apŭng tơchơ̆t ăn ƀok Sáu pơdơ̆h jang ‘nŏh kơ yuơ pơrô̆ bơ̆ jang tang găn jĭ Covid-19 ư̆h tơtom, lê̆ kon pơlei oei akŏm dĭh băl lơ păng pơrô̆ athei ăn oei hơdrô̆ lơ̆m hnam ư̆h kơ tang, pơm ăn đei jĭ hơbŭh tơpŏh kơtang lơ̆m kon pơlei. Jô̆ trŭh kơsơ̆ năr 10/8, tơ̆ tơring Vụ Bổn đei 2 hơnĭh đei jĭ hơbuh, tơ̆ thôn 6 păng thôn 7 hăm 19 ‘nu bơngai jĭ. Lơ̆m au, hơdrô̆ tơ̆ thôn 7 ‘nŏh 16 ‘nu bơngai. Măt bơngai tơpŏh jĭ Covid-19 đei ƀô̆h tơ̆ tơring Vụ Bổn lơ̆m năr 10/8 hlôi pơm ăn măt bơngai tơpŏh jĭ tơ̆ apŭng Krông pach tŏk lơ, hlôi jing apŭng đei bơngai jĭ Covid-19 lơ mă 3 tơ̆ dêh char Dak Lăk. Dang ei, hơnĭh bơ̆ jang dêh char Dak lăk tŏk bŏk iung jang tang găn, hơdrin tơchă dôm bơngai oei tơ jê̆, khăm hơlen păng bơ̆ jang pơgang vă tang găn jĭ Covid-19 tơ̆ tơring Vụ Bổn.

Tơblơ̆ nơ̆r: Amazưt