VOV4.Bahnar  – Kơtơ̆ng ang đơ̆ng Kŏng ang apŭng Krông Pach, dêh char Đăk Lăk, Anih jang hơlen Kŏng ang apŭng tŏk bŏk oei chă hơlen vă pơm hơdăh tơdrong tơglơh anih pơm găch lơ̆m tơring Ea Yiêng pơm ‘nu hơ ioh rơka hơbur. Hơ ioh lôch hơchăng hơnăn Gia Nhi, 8 khei; 2 ‘nu hơ ioh rơka noh Du Mi, 7 xơnăm păng Du Hi, 5 xơnăm, pơđĭ 3 ‘nu oei tơ̆ xăh Ea Yiêng, apŭng Krông Pach, dêh char Đăk Lăk. ‘Nhŏng oh dôm bơngai âu ăn tơbăt, tơdrong đei ƀôh ăh 3 jơ minh puơ̆t kơsơ̆ năr 18/5, ăh 3 ‘nu hơ ioh Mi, Hi păng Nhi năm tơ̆ anih bơ̆ găch kơ unh hnam păng ưh kơ ê chơ nĕng găch tơglơh kơtĭt tơ̆ bơngai. Ăh đei tơdrong, noh lơ bơngai tŏk bŏk oei pơm jang tơ̆ anih ƀuh găch. Ƀôh 3 ‘nu hơ ioh Mi, Hi păng Nhi ƀơm găch kơtĭt, rim bơngai tenh kuăng ‘nhăk đe hơ ioh truh Hnam pơgang tơm tơring Tây Nguyên kâ̆p kư̆u, mă lei yuơ rơka tôch hlăm noh hơ ioh Nhi hlôi lôch hơchăng, 2 ‘nu hơ ioh Mi păng Hi noh da ƀiơ̆ păng tŏk bŏk oei đei hơmet tơ̆ hnam pơgang. Kŏng ang apŭng Krông Pach hlôi truh anih đei tơdrong vă hơlen lăng mă hơdăh tơm a hla chă.

Lan chih păng pơre nơ̆r