VOV4.Bahnar - Trŭh dang ei, hlŏh 140 ‘nu bơngai, oei lơ̆m 47 ŭnh hnam tơ̆ koeng 189/1 Mai Hắc Đế, phương Tân Thành, pơlei tơm Buôn Ma Thuột, dêh char Dak Lăk oei lơ̆m khŭl găn ga kơ yuơ đei 2 ‘nu bơngai tơpŏh jĭ Covid-19. Kon pơlei tơ̆ au tŏk bŏk sơng iŏk đei tơdrong lăng ba kơ tang đơ̆ng ŭnh hnam păng lơ khŭl jang tơpôl tơgŭm ăn. Rim ƀi phe, kơdŭng kơtăp iĕr, bip, ‘nhot sa plei ‘long đei pơtrŭh ăn, tơgŭm ăn đe sw sơđơ̆ng jơhngơ̆m atŭm hăm kơdră tơring tơpŭh hŭt pơrang jĭ.

‘Nhot sa đei chơ ba tơgŭm ăn kon pơlei lơ̆m koeng pơvang tang găn

Đei sơng iŏk dôm tơmam drăm tơ̆ hơnĭh ăn oei hơdrô̆, mŏ Nguyễn Thị Lý (mơng hnam oei tơ̆ koeng 189/1 Mai Hắc Đế) pơma, mŏ đơ̆ng apŭng Ea Kar năm tơ̆ Buôn Ma Thuột mơng hơnĭh oei vă plôih hơnĭh săm. Jang sa kơ ‘năr lăp măh kon jên ăn ƀar ‘nu mĕ kon măr sư sŏng sa kơ ‘năr păng ăn jên mơng hơnĭh oei rim khei. Gơmăng năr 8/5 mư̆h kơtơ̆ng ang koeng sư đei bơngai jĭ Covid-19 mŏ tôch tơtăm. Mă lei, mư̆h đei kang ƀô̆ tơring chă pơtho tơbăt găh tơdrong pơm kiơ̆ rim tơdrong tơchơ̆t găh tang găn jĭ, mŏ jei sơđơ̆ng jơhngơ̆m păng lui akhan tơdrong jĭ jăn gô kĕ tang găn. Dôm năr pơm kiơ̆ “tơdrong tơchơ̆t găn ga”, mŏ hơnơ̆ng pơm kiơ̆ kơ jăp rim tơdrong tơchơ̆t găh tang găn jĭ vă vei lăng năng tông ăn kơdĭh kau păng koeng ƀôt. Mă đơ̆ng ư̆h kơ gơ̆h năm jang lơ̆m dôm năr au ki, hăm tơdrong tơgŭm djru đơ̆ng rim khŭl, rim bơngai păng kơdră tơring, tơdrong erĭh sa kơ kơ ‘năr kơ mĕ kon măr sư jei sơđơ̆ng, pă tơtăm ư̆h kơ măh phe sa ƀa sŏng rim năr bơih. “Khei ‘năr ăn oei hơdrô̆ 21 năr ‘nŏh nhôn tơ ƀơ̆p tŏ sĕt tơdrong tơnap tap, mă lei kơdră tơring hlôi tơgŭm djru tôch kơ lơ. Nhôn sơng iŏk đei por, phe păng tôch kơ lơ ‘nhot sa.”

Phe ƀa, tơmam drăm sa đei pơjao trŭh tơpang ti kon pơlei oei lơ̆m koeng pơvang tang găn

Lơ̆m 47 ŭnh hnam tơ̆ koeng 189/1 Mai Hắc Đế, đei 20 ŭnh hnam, hăm 47 ‘nu bơngai ‘nŏh dôm ŭnh hnam oei mơng lơ̆m 4 rĕng hnam ăn mơng. Găh lơ dôm bơngai au ư̆h kơ đei tơdrong jang sơđơ̆ng kơna tơdrong erĭh sa mơmat tat. Hơnĭh oei đei pơvang tang găn vă tang găn jĭ kơna đe sư ư̆h kơ gơ̆h năm jang tơ̆ au tơ̆ to kơna ư̆h kơ đei kon jên vă răt sa kơ ‘năr. Kơ yuơ lơ lŏh, dôm hơnŭng por tơyông sa tĭl pơgê, dăh mă tơmam drăm sa kơ yuơ đơ̆ng dôm bơngai đei jơhngơ̆m đon ‘lơ̆ng vang chă tơra lơ̆m khei ‘năr au jĭ tôch gĭt kăl hăm đe sư. Yă Đặng Thị Liệu, kon pơlei mơng hnam oei lơ̆m koeng pơvang tang găn tơbăt, 3 năr au, hăm tơdrong tơgum djru tơtom đơ̆ng tơring, ŭnh hnam yă pă đei tơtăm ư̆h kơ măh phe sa ƀa sŏng rim năr bơih. Yă chhơp jơhngơ̆m hăm jơhngơ̆m đon ‘lơ̆ng đơ̆ng rim bơngai vang lăng ba kon pơlei oei lơ̆m koeng pơvang tang găn au.“Gơnơm rim bơngai đei jơhngơ̆m đon ‘lơ̆ng, khŭl jang, kơdră tơring tơgŭm djru kơna nhôn mă kĕ yak hlŏh khei ‘năr mơmat tat au. Nhôn ư̆h pă băt pơma lơ liơ bơih, lăp bơnê kơ đĭ đăng vang tơgŭm nhôn au đĕch.”

Tơmam drăm sa đei klăh asong, ‘nŭng pơ ‘lơ̆ng hơdrol ba ăn kon pơlei oei lơ̆m koeng pơvang tang găn

Jô̆ trŭh năr 15/5, Dơnŏ anĭh vei lăng kon pơlei phương Tân Thành hlôi sơng iŏk đei 30 trĭu, 300 kĭ phe, 100 kơthŭng mi tôm, hlŏh 2 tă ‘nhot păng lơ tơmam drăm sa gĭt kăl anai. Mŏ Vũ Thị Mai Tuyên, Kơdră chĕp pơgơ̆r Khŭl drŏ kăn Koeng kơphô̆ 10, phương Tân Thành tơbăt, đơ̆ng rim tơmam drăm mă dôm bơngai đei jơhngơ̆m đon ‘lơ̆ng tơgŭm ăn, dôm năr au ki, Khŭl hlôi iung jang hơdoi hăm Dơnŏ anĭh vei lăng kon pơlei păng rim khŭl jang kơ phương Tân Thành pôk ăn trŭh tơ̆ tơpang ti kon pơlei hloi. Gô mơ̆ng kiơ̆ tơmam drăm vang tơgop, Khŭl hơvơn rim bơngai jang tơgŭm chă klăh asong pơ ‘lơ̆ng đơ̆ng nŏh ba ăn rim ŭnh hnam kon pơlei. Hăm dôm tơmam drăm hơdrĭh nhen ‘nhot, plei ƀum ‘nŏh rim bơngai jang tơgŭm ba ăn hloi, dôm tơmam drăm gơ̆h mong đunh ‘nŏh gô klăh asong đang ‘nŏh ba ăn.“Trŭh dang ei rim ŭnh hnam kon pơlei jei sơđơ̆ng ƀiơ̆ tơdrong erĭh sa kơ đe sư. Khei ‘năr ăn oei hơdrô̆ lơ̆m 21 năr kơna kăl đei rim tơpôl vang tơgŭm djru ăn kon pơlei oei lơ̆m koeng 189 au. Hăm hơnăp jang kơ dĭh ư̆h kơ lê̆ đei mĭnh ŭnh hnam ayơ ư̆h kơ măh phe sa ƀa sŏng rim năr.” 

Tơdrong lăng ba đơ̆ng khŭl kơdră tơring, tơdrong vang yak hơdoi đơ̆ng lơ bơngai đei jơhngơ̆m đon ‘lơ̆ng hlôi tơgŭm ăn dôm bơngai erĭh sa lơ̆m koeng pơvang tang găn sơđơ̆ng jơhngơ̆m dơ̆ng. Đơ̆ng nŏh tơgop dơ̆ng jơhngơ̆m pran vă đe sư yak hlŏh tơnap tap lơ̆m erĭh sa păng vang kơrŭn jơhngơ̆m lơ̆m tơdrong tơpŭh hŭt pơrang jĭ hơbuh.

Bơngai chĭh: Nam Trang