VOV4.Bahnar - Lăp đơ̆ng rŏng khei ‘năr đei hlŏh 5.300 hơnih ŭnh hơyŭh jơ̆ng ‘năr pơbŭng hnam pơtrŭh ŭnh hơyŭh, dôm khei tơ jê̆ au lơ hơnih ŭnh hơyŭh jơ̆ng ‘năr pơbŭng hnam tơ̆ Dak lăk măh pơm tơjur pơtrŭh ŭnh hơyŭh tơ̆ kơ ‘năr dơ̆ng rim năr. Tơdrong pơdơ̆h pơtrŭh ŭnh hơyŭh khei ‘năr tŏ pơđang hloh gô pơm tơjur đei iŏk yua đơ̆ng tơmơ̆t jên jang kơ hơnih jang, mă lei kiơ̆ dơnih bơ̆ jang ŭnh hơyŭh hơlen, tơdrong mă au vă pơm sơđơ̆ng ‘lơ̆ng ăn tơlei ŭnh hơyŭh, veh ver đei ŭnh hơyŭh kơtang hlŏh tơdrong.

Hơnih ŭnh hơyŭh jơ̆ng ‘năr kơ Kŏng ty Quang Luận - Krông Buk, Dak Lăk

Tŏk bŏk ‘năr tŏ pơđang kơ pơyan phang Tây Nguyên, hơnĭh ŭnh hơyŭh jơ̆ng ‘năr pơbŭng hnam kơ Dơnŏ anih mơdro sa Quang Luận tơ̆ tơring Pơ̆ng Drang, apŭng Krông Ƀuk, dêh char Dak Lăk hơnhăk đei iŏk yua ƀar tơdrong, mĭnh păh pơm rơngơp ăn hơnih mong răk tơmam drăm, minh păh pơtrŭh ŭnh hơyŭh tơgŭm ăn pơm tơlĕch tĕch mơdro tơmam drăm ming man, phŏng, adoi đei kon jên đơ̆ng tĕch ŭnh hơyŭh ăn tĕh đak. Tơngla hơnih mơdro sa, yă Nguyễn Thùy Trang, tơbăt, ‘nau kon jên tơmơ̆t jang đei iŏk yua kơ jăp, mă đơ̆ng dang ei măh pơm tơjur pơtrŭh ŭnh hơyuh rim năr.“Đunh kơ au 5 khei, ĭnh pơlăp ŭnh hơyŭh jơ̆ng ‘năr pran 500Kwp ‘nŏh kon jên iŏk đei đơ̆ng tĕch ŭnh hơyŭh au rim khei jei đơ̆ng 100- 120 trĭu hlak jên. Tơdăh ưh kơ đei tơdrong kiơ lei ‘nau jing trong tơmơ̆t jên jang đei iŏk yua kơ jăp hlŏh. Đơ̆ng blŭng sơnăm trŭh dang ei ‘nŏh păh hnam kmăi ŭnh hơyŭh đei tơchơ̆t tơjur pơtrŭh ăn ŭnh hơyŭh, đei năr tơjur pơtrŭh ŭnh hơyŭh trŭh 15%, ‘nŏh nhôn jei jang kiơ̆ kơ jăp; pơtih gia nhen 9 jơ pơgê tơpăt ŭnh hơyŭh ‘nŏh đei kŏng nhân jang ŭnh hơyŭh năm tơpĭt, trŭh 2 jơ kơsơ̆ ‘nŏh đe sư trŭh tơ̆ au vă tơgŭm ăn hơnih mơdro sa dă ƀiơ̆ tơhoach kon jên jang”.

Jei măh pơdơ̆h pơtrŭh ŭnh hơyŭh jơ̆ng ‘năr tơ̆ ‘năr dơ̆ng đơ̆ng hlŏh 2 khei au ki, ƀok Vũ Khắc Lợi, tang măt ăn kŏng ty pơm tơlĕch tơmam drăm chŏh jang sa tĕch mơdro tơ̆ tĕh đak đe lơ̆m Hơnih jang kmăi kmŏk Buôn Hồ, dêh char Dak Lăk, tơbăt: Vă iung jang đei iŏk yua kơ jăp hơnih ŭnh hơyŭh jơ̆ng ‘năr pơbŭng hnam đei pran 1 MWp, hơnih mơdro sa hlôi jang kiơ̆ iŏk yua ŭnh hơyŭh pơkom, sơđơ̆ng ‘moi kiơ̆ nơ̆r pơtho khan đơ̆ng hơnĭh bơ̆ jang găh ŭnh hơyŭh, adoi hơnơ̆ng atŏk kơtang bơ̆ jang pơm tơlĕch tơmam drăm: “Đei jơ ‘năr tơjur pơtrŭh 7%, 11% dăh mă 15% ‘nŏh nhôn oei pơm kiơ̆ kơ jăp đĕch. Tơdrong iŏk yua ŭnh hơyŭh lơ̆m jơ ‘năr au ‘nŏh kŏng ty tơpĭt pơ đĭ rim kmăi kmŏk ư̆h kơ kăl, dăh mă lơ̆m hnam sơngiĕo mong răk tơmam drăm ‘nŏh tơ jur pơm sơngiĕo, lăp măh rơngơp ăn tơmam drăm đĕch. Păng Kŏng ty tŏk bŏk tơ iung pơjing ming man dơ̆ng minh hơnĭh pơm tơlĕch tơmam drăm ‘nao vă pơm tơlĕch đei tơmam drăm lơ hlŏh ƀar ‘măng pơtêng hăm hơdrol au ki”.

Hơnih mơdro sa atŏk kơtang jang pơm tơlĕch tơmam drăm plei ‘long vă iŏk yua lơ ŭnh hơyŭh jơ̆ng ‘năr pơbŭng hnam

Kiơ̆ đơ̆ng ƀok Hà Văn Chương, Kơ iĕng Kơdră chĕp pơgơ̆r Kŏng ty ŭnh hơyŭh Dak Lăk, lơ̆m dêh char hrei au đei 5.339 hơnih ŭnh hơyŭh jơ̆ng ‘năr pơbŭng hnam hăm đei pran vă jê̆ 650.000 KWp. Khei ‘năr au hlôi đei hlŏh 400 hơnĭh măh pơm kiơ̆ tơjur pơtrŭh ŭnh hơyŭh, kơ yuơ rơkăh rơkai ŭnh hơyŭh. ‘Nau dôm hơnih ŭnh hơyŭh đei pran đơ̆ng 100KWp năm tơ̆ lơ, đei tram biên ap kơ dih vă pơtrŭh ŭnh hơyŭh tŏk tơ̆ tơlei. Lăp dôm hơnih ŭnh hơyŭh jơ̆ng ‘năr pơbŭng hnam iĕ, chô̆ tơmơ̆t hloi lơ̆m tơlei ŭnh hơyŭh iŏk yua lơ̆m ŭnh hnam ‘nŏh ư̆h kơ đei tơjur. Tơblang hơdăh găh tơdrong kăl pơm tơjur pơtrŭh ŭnh hơyŭh kơ rim hơnĭh ŭnh hơyŭh jơ̆ng ‘năr (hmă hmă kăt tơjur tơ̆ kơ ‘năr dơ̆ng - jơ ‘năr tŏ hlŏh lơ̆m năr), Ƀok Hà Văn Chương tơbăt: “Jơ̆ng ‘năr đơ̆ng măt ‘năr pơchrang đơ̆ng 20 – 25% ‘nŏh kmăi kmŏk tơlei ŭnh hơyŭh mă sơđơ̆ng. Tơdăh lơ hlŏh kơ ‘nŏh lei tơdrong pơm sơđơ̆ng kmăi kmŏk tơlei ŭnh hơyŭh tôch mơmat tat. Kơ yuơ jơ̆ng ‘năr pơchrang rơdu kơtang hơnơ̆ng gô mơ̆ng kiơ̆ tŏ ‘mi kial, kiơ̆ kơ ‘năr-gơmăng păng đei ‘măng hơmơ̆l klơ̆p. Kơ yuơ lơ lŏh tơdrong kăt tơjur pơtrŭh ŭnh hơyŭh jơ̆ng ‘năr lơ̆m khei ‘năr kăl hlŏh ‘nŏh jing tơdrong tôch gĭt kăl vă pơm sơđơ̆ng ăn bơ̆ jang tơlĕch ŭnh hơyŭh”.

Jei kiơ̆ đơ̆ng ƀok Hà Văn Chương hơlen, hăm dôm hơnih ŭnh hơyŭh jơ̆ng ‘năr pơbŭng hnam ming man pơlăp tơ̆ pơbŭng hnam mong răk tơmam drăm, pơbŭng hnam rong nhŭng iĕr tŏk bŏk oei bơ̆ jang, mă đơ̆ng tơjur pơtrŭh ŭnh hơyŭh mă lei tơdrong jang sa iŏk đei oei ‘lơ̆ng đĕch, kơ yuơ đe hăp iŏk yua ŭnh hơyŭh đơ̆ng ŭnh hơyŭh jơ̆ng ‘năr kơ dih au. Lăp hơdrô̆ hơnih ŭnh hơyŭh jơ̆ng ‘năr pơbŭng hnam mă tơ̆ hơla pơbŭng hnam au ưh kơ đei chă jang pơm tơlĕch tơmam drăm yă kiơ lei đe sư hiong răm tŏ sĕt kơ yuơ ư̆h kơtĕch đei ŭnh hơyŭh. Kơ yuơ lơ loh, tơngla tơmơ̆t jên jang kăl hơlen mă brĕ tơdrong iŏk yua ŭnh hơyŭh tôm tơdrong ăn hơnih ŭnh hơyŭh jơ̆ng ‘năr pơbŭng hnam kơ dih bơ̆n.

Bơngai chih: Minh Huệ

Tơblơ̆ nơ̆r: Amazưt