VOV4.Bahnar - Năr 8/10, Kŏng ang pơlei tơm Buôn Ma Thuô̆t, dêh char Dak Lăk tơchơ̆t tơkêng bơngai pơm glăi, ư̆h kơ ăn lĕch đơ̆ng tơring oei sa hăm Đỗ Thanh Hải, 36 sơnăm, oei lơ̆m phương Tân Lợi, pơlei tơm Buôn ma Thuô̆t, dêh char Dak lăk. Tơchơ̆t tơkêng Hải vă xek tơlang tơdrong pơm glăi “Pơm tơpŏh jĭ hli hlơt ăn kon bơngai” kiơ̆ Apăng 1, chăl 240 Bộ luật hình sự. Kiơ̆ pơtôch dăr lăng đơ̆ng Kŏng ang, Đỗ Thanh Hải ‘nŏh bơngai vei lăng Hơnĭh jang gre chơ tơmoi Tiến Oanh, hnam kơsô̆ 134 Hai Bà Trưng, phương Thắng Lợi, pơlei tơm Buôn Ma Thuơ̆t. Gơmăng năr 10/7, Hải hăm 2 ‘nu bơngai anai hao mĭnh tong gre kơsô̆ 50H-052.70 đơ̆ng pơlei tơm Hồ Chí Minh vĭh tơ̆ Buôn Ma Thuột. Khei năr au, pơlei tơm Hồ Chí Minh ‘nŏh tơring đei jĭ. Mư̆h vĭh trŭh hơnĭh jang gre chơ tơmoi, Hải ư̆h kơ đei năm tơroi tơbăt akau jăn ăn ƀok thây pơgang kiơ̆ tơdrong tơchơ̆t, mălei hlôi năm trŭh rim hơnĭh lơ̆m pơlei tơm Buôn Ma Thuơ̆t păng tơ ƀơ̆p lơ bơngai. Lăp đơ̆ng rŏng khăm hơlen đei jĭ, kơ dĭh Hải jei oei ư̆h tơroi tơbăt tơpăt sư hlôi năm tơ̆ hơnĭh ayơ pơm ăn tơdrong bơ̆ jang tơchă dôm bơngai tơ ƀơ̆p sư tôch tơnap tap. Hlŏh đơ̆ng hơlen hơdăh, kŏng ang sơkơ̆t hơdăh Đỗ Thanh Hải hlôi pơm ăn 10 ‘nu bơngai oei lơ̆m pơlei tơm Buôn Ma Thuô̆t tơpŏh jĭ Covid-19. Dơnŏ anĭh bơ̆ jang tŏk bŏk pơm pơkeh hla bơar, xek tơlang bơngai pơm glăi kiơ̆ tơdrong tơchơ̆t kơ khôi luơ̆t.

Tơblơ̆ nơ̆r: Amazưt