VOV4.Bahnar  – 'Năr brei (21/7), Anih jang Kanh sat hơlen Kŏng ang plei tơm Buôn Ma Thuột (Đăk Lăk) hlôi tơchơ̆t tơkêng tơdrong yoch “Pơhnŏng pơm tơpoh pơrang jĭ hli hlơt hăm kon bơngai”. Adrol kơ noh ăh năr (17/7), Jơnŭm pơgơ̆r tang găn păng tơjră pơrang jĭ Covid - 19 dêh char Đăk Lăk tơroi găh tơdrong mă N.T.H., 36 xơnăm, oei tơ̆ thôn 3, xăh Cư Êbua, plei tơm Buôn Ma Thuột, (jang tơ̆ anih jang găh gre vih vơ̆t Tiến Oanh, ăh anih 134 Hai Bà Trưng, phương Thắng lợi) ƀơm jĭ Covid – 19.

          Kiơ̆ tơdrong hơlen mă blŭng đơ̆ng anih jang kơpal, adrol kơ noh,  H. đei năm truh tơring hơbuh pơrang jĭ plei tơm Hồ Chí Minh, păng truh năr (10/7) chôt vih tơ̆ tơring mă lei ưh đei tơroi y tê̆, ưh đei pơkăp oei tơklăh kiơ̆ tơchơ̆t, oei năm truh lơ anih, pơma dơnuh hăm lơ bơngai. Khei năr âu, Đăk Lăk hlôi xơkơ̆t đei 13 'nu ƀơm jĭ Covid-19 đei tơrĕk đơ̆ng H. Kiơ̆ kơ tơdrong đei ƀôh, anih jang kơpal hlôi đei tôm tơdrong vă pơkăp tơkêng tơdrong yoch “Pơhnŏng pơm tơpoh pơrang jĭ hli hlơt hăm kon bơngai”.

Lan chih păng pơre nơ̆r