VOV4.Bahnar - Pơyan phĕ chehphe 2021-2022, hlôi vă trŭh pơyan phĕ, Dak lăk kăl đei kơ hrĕng rơbau ‘nu bơngai phĕ. Mă lei, lơ̆m khei ‘năr jĭ hơbŭh Covid-19 oei pơrăm kơtang ‘nŏh tơdrong hơmet ăn khŭl jang vă sơđơ̆ng bơngai chă phĕ, sơđơ̆ng jĭ hơbŭh, tŏk bŏk jing tơdrong tơtăm kơtang đơ̆ng kon pơlei jang sa păng kơdră chĕp pơgơ̆r tơring tơ̆ Dak Lăk.

Kon pơlei Dak Lăk hơmet ăn phĕ chehphe 2021-2022

Hăm 2ha chehphe, rim sơnăm mư̆h trŭh pơyan phĕ, ŭnh hnam ƀok Hoàng Đoàn, Kty 4, tơring Chư Kbô, apŭng Krông Ƀuk măh kăl đei đơ̆ng 4-5 ‘nu bơngai jang chă phĕ lơ̆m dang 2 khei. Ŭnh hnam lăp hơdrô̆ 2 ‘nu klo akăn, kon hơ ‘lơ̆p năm hŏk ngăl kơna ƀok măh hơvơ̆h dơ̆ng 2 ‘nu bơngai jang chă phĕ. Mă lei sơnăm au, ƀok jei tôch pơngơ̆t kơ yuơ trŭh dang ei oei tim mă twochă đei bơngai chă phĕ. Rim sơnăm, bơngai jang lơ đơ̆ng rim dêh char Gia Lai, Phú Yên, Bình Định trŭh, mă lei sơnăm au kơ yuơ jĭ hơbŭh Covid-19 pơrăm kơtang, ư̆h gan ăn chă yơ yak, kơna bơngai năm chă phĕ chehphe pơyan au gô ư̆h kơ măh. “ Tơdăh bơ̆n phĕ oei kơ sĕ ‘nŏh găr ‘lơ̆p, ư̆h kơ trăp, tơdăh lê̆ đunh dêh hnang jei răm sơdrông pơrăm păng găr jei ư̆h kơ gan ‘lơ̆ng. Tŏk bŏk khei 11 ‘nŏh phĕ bơih. Tơdăh 1 ŭnh hnam đơ̆ng 7-8 tân, 4 ‘nu bơngai phĕ hơnơ̆ng jei kơtĕch 2 khei ‘mơ̆i mă đang. Kơna pơtêng hăm tơdrong atŭm lơ̆m sơnăm au jĭ hơbŭh ‘nŏh tơdrong ‘mĕh vă tơchă bơngai jang jei tôch tơnap tap hăm ŭnh hnam nhôn”

Jei pơngơ̆t tơdrong au, ƀok Phan Trọng Ký, Kơdră chĕp pơgơ̆r Hơp tak xah tĕch răt tơmam drăm chŏh jang sa tơring Chư Kbô, apung Krông Ƀuk tơbăt, Hơp tak xah đei 230 ha chehphe, pơm tơlĕch đei chehphe ‘lơ̆ng kơna kăl đei lơ bơngai jang păng khei năr phĕ jei tơhoach lơ năr jang hlŏh pơtêng hăm jang chehphe hmă. Rim sơnăm, rim bơngai jang lơ̆m hơp tak xah pơjing khŭl jang hơpong vă tơgŭm dĭh băl phĕ păng chă hơvơ̆h dang 20% ‘nu bơngai đơ̆ng ‘ngoăih jang ăn. Mă lei sơnăm au, tơ̆ hơnăp pơrang jĭ tơpŏh kơtang, măt bơngai jang chă hơvơ̆h đơ̆ng ‘ngoăih gô tơ ƀơ̆p tơnap tap. “Lơ̆m Hơp tak xah găh mir pơgar găh lơ̆m ŭnh hnam, băt hơdăh rim ŭnh hnam ‘lơ̆m khul đei 2 ‘nu bơngai jang, kơna lơ̆m pơyan phĕ kăl đei dơ̆ng 2-3 ‘nu bơngai vang jang kơna ư̆h kơ măh dang 50% dang ei jĭ tŏk bŏk mơ hoal tơchă bơngai. Rim sơnăm lơ̆m khei năr au bơngai jang đơ̆ng: Quảng Ngãi, Krông Pa ( Gia Lai) …sơnăm au jĭ jăn lơ lau, bơngai jang brŏk đơ̆ng Bình Dương, Sài Gòn jei ư̆h kơ lơ, mă măt bơngai jang sơnăm sơ̆ ‘nŏh ư̆h kơ đei năm, rŏ năng tơnap mă tơchă đei bơngai jang”

Kiơ̆ đơ̆ng ƀok Phan Hoàng Lâm, Kơ iĕng Kơdră chĕp pơgơ̆r Dơnŏ anĭh vei lăng kon pơlei apŭng Krông Ƀŭk, lơ̆m au đei dang 20.600ha chehphe, phĕ ot đei dang 60.000 tân chehphe găr lơ̆m sơnăm. Hlŏh đơ̆ng hơlen lơ̆m rim sơnăm tơ jê̆ au, măt bơngai jang lơ̆m tơring vang chă phĕ chehphe lơ̆m apŭng lăp măh ăn dang 75-80%, pă dôm yơ ‘nŏh kăl đei bơngai jang đơ̆ng dêh char anai, găh lơ vang chă phĕ ăn dôm ŭnh hnam đei mir pơgar chehphe să. Pă 1 poăt khei ‘nŏh chehphe lơ̆m tơring trŭh pơyan phĕ păng kăl đei lơ bơngai jang. Kơ yuơ lơ lŏh, tơdrong sơđơ̆ng măt bơngai phĕ, adoi sơđơ̆ng tang găn jĭ hơbŭh hlôi đei apŭng tơ iung pơjing trong jang hơdăh, vĕh ver jơhngơ̆m đon tơtăm ăn kon pơlei găh ư̆h kơ măh bơngai jang. Mă kăl, apŭng hlôi pơjing trong jang tơgŭm ăn kon pơlei phĕ chehphe lơ̆m khei ‘năr đei jĭ hơbŭh Covid-19, mă kăl dôm tơring hơmơt đei jĭ hơbŭh kơtang păng tơring pơvang tang găn. “ Tơdăh tơdrong ‘mĕh vă đei bơngai chă phĕ chehphe lơ̆m pơlei đei pơvang tang găn ‘nŏh nhôn iŏk yua khŭl jang hăm trong tơlĕch jang 4 kơtă kơ tơring vă tơgŭm ăn tơdrong chă phĕ chehphe ăn kon pơlei. Iŏk yua khŭl dân quân tự vệ, khŭl đoàn hơdrŭh tơdăm, khul bơngai jang tơgŭm vang tơgŭm kon pơlei chă phĕ chehphe”.

Kiơ̆ đơ̆ng Dơnŏ anĭh vei lăng Chŏh jang sa păng Atŏk tơ iung tơring tơrang dêh char Dak Lăk tơbăt, pơyan phĕ chehphe 2021-2022, Dak Lăk đei hlŏh 209.000 ha, hăm phĕ ot đei hlŏh 500.000 tân. Vă sơđơ̆ng ăn chă phĕ chehphe lơ̆m pơyan au ‘lơ̆ng hơ iă, rim apŭng kăl tơlĕch hloi trong jang chă hơvơn khŭl jang phĕ chehphe mă ƀlep hăm tơdrong đei jĭ hơbŭh pơrăm. Lơ̆m au, rim tơring kăl lăng trŭh rim tơring hơmơt mă 3 păng tơring hơmơt mă 4, kơ yuơ ư̆h khan lăp hơdrô̆ phĕ chehphe mă lei tơdrong chă chŏh jang sa au to jei tơ ƀơ̆p tôch tơnap tap. Ƀok Vũ Đức Côn, Kơ iĕng Kơdră chĕp pơgơ̆r Dơnŏ anĭh vei lăng Chŏh jang sa păng Atŏk tơ iung tơring tơrang dêh char Dak Lăk tơbăt: Dơnŏ anĭh vei lăng kon pơlei dêh char pơjao ăn Dơnŏ anĭh vei lăng Chŏh jang sa păng Atŏk tơ iung tơring tơrang dêh char pơm tơm, iung jang hơdoi hăm rim hơnĭh bơ̆ jang tơroi tơbăt, pơtho tơbăt ăn Dơnŏ anĭh vei lăng kon pơlei rim apŭng, thĭ xah, pơlei tơm pơjing trong jang phĕ chehhe sơđơ̆ng dơ̆ng kơ jăp.“Dêh char hlôi chĭh pơtrŭh hla bơar athei rim apŭng trŭh hloi dôm tơring pơvang tang găn ‘nŏh kăl đei trong tơlĕch jang pơjing rơvơn ăn kon pơlei jang sa, tơdăh ăn asong jang lei kăl đei pơtho tơbăt hơdăh, mă hơlen tơring hăm apŭng gô jang. Tơdrong chă jang tơ̆ mir hoei ƀơm kơnê̆ kơtang pơtêng hăm jang tơ̆ hơnĭh jang kmăi kmŏk pơm tơlĕch tơmam drăm kơna dăh ăn asong kon pơlei chă jang sa, mă kăl ‘nŏh kăl đei pơrô̆, tơlĕch jang mă ‘lơ̆ng, mă hơdăh đĕch.”

Mĭnh pơyan phĕ ‘nao hlôi trŭh, lơ̆m khei ‘năr jĭ hơbŭh pơrăm kơtang, kon pơlei jang chehphe pơma hơdrô̆ păng kon pơlei jang sa dêh char Dak Lăk pơma atŭm tŏk bŏk atŭm hăm kơdră tơring hơdrin tơchă trong vă hơvơn bơngai jang phĕ chehphe trŏ lăp hăm khei ‘năr đei jĭ hơbŭh Covid-19, trŏ ƀlep hăm trong tơlĕch jang, tơdrong tang găn jĭ hơbŭh Covid-19.

Bơngai chĭh: Hương Lý

Tơblơ̆ nơ̆r: mazưt