VOV4.Bahnar - Pơ gê ‘năr 30/3, tơ̆ pơ lei tơm Buôn Ma Thuột, Anih jang vei lăng găh tơ drong kơ tơ̆ng ang păng tơ roi tơ băt dêh char Dak Lak hlôi pơ gơ̆r pơ hrăm tơ drong jang tơ roi tơ băt ‘măng pôk rơ̆ih bơ ngai tang măt quốc hội jăl 15 păng pôk rơ̆ih bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026. Hloh 130 ‘nu bơ ngai hŏk ‘noh kơ dră chĕp kơ̆l, bơ ngai chih kơ tơ̆ng ang, bơ ngai chih hơ met ming rim anih jang chih kơ tơ̆ng ang tơ̆ tơ ring păng bơ ngai chih kơ tơ̆ng ang rim anih jang chih kơ tơ̆ng ang Trung ương oei tơ̆ Dak Lak vang pơ hrăm.

Anih jang Nội vụ dêh char dak Lak akhan, tơ drong jang tơ roi tơ băt kơ tơ̆ng ang pơm hơ năp jang tôch kơ gĭt kăl lơ̆m jơ nei đơ̆ng ‘măng hop akŏm Bơ ngai tang măt Quốc hội jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021 – 2026. Kiơ̆ đơ̆ng tơ drong jang tơ roi tơ băt pơm ăn đĭ đăng Đảng, đĭ đăng lĭnh păng đĭ đăng kon pơ lei hlôh vao hơ dăh tơ drong tơm, hơ năp jang, tơ drong ‘lơ̆ng, tơ drong gĭt kăl đơ̆ng tơ drong jang chĭnh trĭ âu ‘noh jĭ vă rơ̆ih iŏk đei dôm bơ ngai tang măt hơ gei, tơ găl tang măt ăn đon hơ drin, ‘meh vă păng tơ drong pơm tơm đơ̆ng kon pơ lei.

Thuem: Tơ blơ̆