VOV4.Bahnar - ‘Năr 26-8, Anih vei lăng pơ tho pơ hrăm dêh char Dak Lak tơ lĕch hla ar chih găh tơ drong bơ̆ jang kiơ̆ trong pơ gơ̆r hŏk sơ năm hŏk 2021 – 2022. Kiơ̆ kơ ‘nŏh,  anih pơ tho pơ hrăm dêh char ưh đei pơ gơ̆r sơng hŏk tro năm hŏk lơ̆m ‘năr 1-9 truh.

Kơ dră chĕp kơ̆l Anih vei lăng pơ tho pơ hrăm dêh char Dak Lak athei, đơ̆ng ‘năr 1-9 truh năr pơm lêh mât hŏk sơ năm hŏk ‘nao, kơ dră chĕp kơ̆l rim anih kơ chăng hơ met pơ ‘lơ̆ng rim tơ drong vă pơm lêh mât hŏk sơ năm hŏk ‘nao păng pơ tho hŏk pơ hrăm; roi tơ băt vă hŏk tro păng mĕ ƀă hŏk tro băt găh trong pơ gơ̆r pơ tho hŏk đơ̆ng hnam trưng, pơ tho tơ ƀôh ăn hŏk tro hŏk trư̆k tuyê̆n.

Găh tơ drong pơm lêh mât hŏk sơ năm hŏk ‘nao 2021 – 2022 lơ̆m ‘năr 5-9-2021, hla ar chih hơ dăh: Pơ gơ̆r pơm lêh trư̆k tuyê̆n hăm dôm hnam trưng đei tôm kơ măy kơ kŏk ‘nao. Đơ̆ng rŏng kơ pơm lêh mât hŏk sơ năm hŏk ‘nao, rim hnam trưng pơ gơ̆r pơ tho hŏk trư̆k tuyê̆n dăh mă kiơ̆ trong nai mă lăp hăm rim tơ drong tơ̆ yăn âu đơ̆ng jĭ COVID-19 păng tơ drong gơ̆h pơ gơ̆r đơ̆ng hnam trưng, đơ̆ng tơ ring tơ rang, mă lei ưh đei pơ gơ̆r hŏk trư̆k tuyê̆n hăm đe hơ iŏh mâm non.

Dơ̆ng: Tơ blơ̆