VOV4.Bahnar - Kơ tơ̆ng ang đơ̆ng Anih vei lăng găh jang pơ gang Dak Lak kơ sơ̆ ‘năr (26/10) tơ băt, anih jang pơ gang dêh char tŏk bŏk tơ ƀơ̆p mơ mat tat lơ̆m tơ drong iŏk răt dôm kơ loăi pơ gang păng tơ mam kơ măy kơ mŏk jang pơ gang pơ yua ăn khăm, hơ met ăn bơ ngai jĭ, mă loi ‘noh bơ ngai jĭ SARS-Cov-2. Tơ drong tơm kơ tơ drong ‘nâu ‘noh jĭ yua đơ̆ng lơ bơ ngai iŏk jang ưh kơ gơ̆ih hla ar hô sơ vang iŏk jang yua đơ̆ng bưu điện ưh kơ bơ̆ jang, rim hnam gre ưh kơ dâu, lơ kŏng ti iŏk jang oei lơ̆m hơ nih pơ vang găn, ăn oei hơ drô̆ kơ na ưh kơ pơm đei hla ar hô sơ vang iŏk jang.

Tơ̆ hơ năp tơ drong ‘nâu, Anih vei lăng găh jang pơ gang dêh char Dak Lak hlôi pơm hla ar apĭnh Anih vei lăng kon pơ lei dêh char Dak Lak athei Anih tơm  vei lăng găh jang pơ gang, Khŭl kơ dră teh đak tơ gŭm, klăih song pơ gang păng tơ mam kơ măy kơ mŏk jang pơ gang tơ tĕnh ăn tơ ring pơ yua ăn tơ drong jang khăm, hơ met ăn bơ ngai jĭ. Ƀơm truh jĭ Covid -19 tơ̆ Dak Lak, jô̆ truh đơ̆ng 4 jơ kơ sơ̆ ‘năr 25/10 truh 4 jơ kơ sơ̆ ‘năr 26/10, lơ̆m dêh char đei 150 ‘nu jĭ SARS-Cov-2. Pơ lei tơm Buôn Ma Thuột oei jing hơ nih chă ƀôh lơ bơ ngai jĭ lơ̆m tơ pôl.

Thuem: Tơ blơ̆