VOV4.Bahnar - Dêh char Dak Lak tŏk bŏk tơ lĕch jang tơ drong jang tơ gŭm pơ yan pơ long tơ̆ 32 hơ nih pơ long lĕch ‘măng khoă hŏk đĭ jăl 3 sơ năm 2021, hăm vă jê̆ 1.000 ‘nu hơ druh tơ dăm năm jang tơ gŭm. Kiơ̆ kơ Anih jang Đoan dêh char Dak Lak, tơ drong jang tơ gŭm pơ yan pơ long sơ năm ‘nâu đei tơ lĕch jang lơ̆m khei ‘năr dêh char đei bơ ngai tơ poh jĭ SARS-CoV-2. Kơ lih thoi noh, rim bơ ngai jang tơ gŭm gô akŏm tơ gŭm hơ puih hơ met, pruih pơ gang rim hơ nih pơ long, tơ roi tơ băt tơ drong pơ kăp pơ long, tơ drong hơ găt găh tang găn jĭ Covid-19 păng dôm tơ drong hŏk tro kăl kơ băt truh.

Dak Lak đei vă jê̆ 1.000 ‘nu hơ druh tơ dăm năm jang tơ gŭm vang tơ gŭm pơ yan pơ long sơ năm 2021

Hơ dai hăm ‘noh, lei lăi nhen rim sơ năm, rim bơ ngai jang tơ gŭm hơ nơ̆ng chă hơ len lăng hơ năn hŏk tro mơ mat tat vă krao hơ vơn tơ gŭm. Mă kăl ‘noh, trang kơ tơ̆ng ang tơ gŭm pơ yan pơ long – Dak Lak lơ̆m mạng tơ pôl Facebook pơ tơm tơ ƀôh mŭh măt păng tơ roi hơ nơ̆ng dôm tơ drong kơ tơ̆ng ang găh tơ drong jang ‘măng pơ long tơ gŭm mĕ ƀă păng hŏk tro băt hơ dăh kơ tơ̆ng ang 1 trong hrĕnh păng ƀlep.

Thuem: Tơ blơ̆