VOV4.Bahnar - Hăm tơ drong vang tơ gŭm đơ̆ng lơ khul grŭp, tơ pôl păng lơ bơ ngai, lơ̆m dôm năr âu ki, Anih Mặt trận tổ quốc Việt Nam dêh char Dak Lak mong akŏm đei vă jê̆ 200 tân ‘nhot, ƀum, plei ‘long lơ kơ loăi, “vang tơ gŭm” ăn plt Hồ Chí Minh vă tơ gŭm ăn kon pơ lei tơ̆ tơ ring đei jĭ. 

Lơ gre chơ tơ mam đơ̆ng dôm apŭng chơ chuĕn tơ mam ming tơ̆ Anih jang đoan dêh char

Hăm tơ drong tơ guăt dôm trang mang tơ pôl Facebook, ưh lăp bơ ngai tơ̆ Dak Lak đĕch mă dôm bơ ngai pơ tăm ‘nhot tơ̆ dêh char Lâm Đồng kŭm vang tơ gŭm, gơih tơ mam ăn kon pơ lei tơ̆ tơ ring oei pơ vang găn yoa tơ drong jĭ covid-19.

‘Nhot, ƀum đei rơih hơ met, ôp rơ gŏh adrol kơ tăh lơ̆m tơ pu vă chơ năm

Yă H’Kim Hoa Byă, Kơ dră Anih krao hơ vơn kon pơ lei dêh char, Kơ dră Anih Mặt trận Tổ quốc Việt Nam dêh char Dak Lak ăn tơ băt, 1 giĕng âu ki, mặt trận jơ̆p tơ ring lơ̆m dêh char mong akŏm đei vă jê̆ 200 tân ‘nhot, ƀum, plei ‘long.

Dôm tơ mam âu mong akŏm tơ̆ 1 anih, đang kơ ‘nŏh rơih hơ met, hŭt lê̆ ‘nhot hư adrol kơ tăh lơ̆m tơ pu chơ năm tơ̆ plt Hồ Chí Minh. Lơ gre chơ ƀĕnh ‘nhot, plei ‘long păng tơ mam yoa kăl hơ nhăk ba jơ hngâm đon ‘lơ̆ng kŭm hăm nơ̆r pơ lung đơ̆ng kon pơ lei Dak Lak vang jang kŭm hăm tĕh đak tang găn đĭ jĭ hơ buh.

Dơ̆ng: Tơ blơ̆