VOV4.Bahnar - Anih pơ gơ̆r jang tang găn jĭ COVID-19 dêh char Dak Lak ‘nao tơ lĕch trong tơ gŭm chơ iŏk kon pơ lei Dak Lak đơ̆ng dôm tơ ring đei jĭ ‘mĕh vih dơ̆ng tơ̆ dêh char yoa ƀơm kơ nê̆ đơ̆ng jĭ COVID-19.

Dôm bơ ngai đei tơ gŭm ‘nŏh đei: Grŭp 1 jĭ dôm bơ ngai kră, hơ iŏh, drŏ kăn hơ năp, drŏ kăn oei rong kon hơ la kơ 36 khei, bơ ngai năm khăm, hơ met jĭ, bơ ngai năm ngôi tơ̆ ‘nhŏng ŏh tam gơ̆h brŏk, bơ ngai jang găh unh hnam tơ nuh, bơ ngai jang lơ̆m unh hnam đei kŏng hăm kăch mang, bơ ngai jang oei xa yoa jên tơ gŭm rim khei; Grŭp 2 ‘nŏh bơ ngai năm jang ăn kơ đe, bơ ngai hiong tơ drong jang; Grŭp 3 ‘nŏh hŏk tro, sinh viên păng dôm bơ ngai nai.

Tơ chĕng adrol, ‘măng sơng iŏk mă blŭng vă pơ gơ̆r hloi lơ̆m giĕng truh hăm dang 500 ‘nu bơ ngai. Anih vei lăng jang pơ gang dêh char Dak Lak ăn tơ băt, vă tơ drong chơ iŏk kon pơ lei vih tơ̆ tơ ring gơ̆h sơ đơ̆ng ‘lơ̆ng, tơ drong chă rơih bơ ngai gô đei bơ̆ jang tôch hơ len.

Dơ̆ng: Tơ blơ̆