VOV4.Bahnar - Khei ‘năr tơ jê̆ âu, tơ̆ dak lak hơ nơ̆ng đei ƀôh dôm hơ nih bơ ngai tơ poh jĭ Covid-19 lơ̆m tơ pôl. Tơ jră hăm đei ƀôh jĭ krê hơ mơt, Dak Lak hlôi vei kơ jăp trong jang ki luơ̆t, hơ tŏk loi dơ̆ng tơ roi tơ băt krao hơ vơn kon pơ lei hơ tŏk ‘lơ̆ng đon băt kơ chăng tang găn jĭ. Hơ dai hăm ‘noh hơ tŏk tơ drong jang iŏk - hơ met jĭ Covid-19 tơ hnam pơ gang đa khoa Krông Buk tŏk hloh 2 ‘măng, hơ met ăn dơ̆ng 2 hơ nih ăn oei hơ drô̆ akŏm tih tơ̆  Buôn Ma Thuột, tôm hơ nih ăn dang 1.300 ‘nu.

Đơ̆ng rŏng vă jê̆ 2 giĕng tơ jur tơ drong ăn oei hơ drô̆ lơ̆m tơ pôl kiơ̆ tơ chơ̆t 16 jur pơm kiơ̆ tơ chơ̆t 15 đơ̆ng Thủ tướng teh đak, pơ lei tơm Buôn Ma Thuột, dêh char Dak Lak hlôi vei kơ jăp hơ lơ̆k dơ̆ng dôm tơ drong hơ găt ưh kơ ăn yak vih vơ̆t tang găn jĭ hơ buh. Lăp 13 năr, đei ƀôh 4 hơ nih tơ poh lơ̆m tơ pôl hăm vă jê̆ 50 ‘nu jĭ ‘nao, ưh khan lăp pơm ăn pơ lei tơm Buôn Ma Thuột vih hơ lơ̆k dơ̆ng hăm tơ chơ̆t 16 mă hơ dai hăm ‘noh pơ gơ̆r hơ len lăng hrĕnh lơ̆m tơ ring, hăm vă jê̆ 102 rơ bâu ŭnh hnam kon pơ lei. Ƀok Vũ Văn Hưng, Kơ dră Anih vei lăng kon pơ lei pơ lei tơm Buôn Ma Thuột tơ băt, đei 70 grŭp hơ len lăng hlôi đei pơ jing, păng gô hơ len lăng hơ nơ̆ng đơ̆ng ‘năr 27/8. Hơ dai hăm ‘noh, ‘măng ăn oei hơ drô̆ kơ hret hloh mă pơ lei tơm pơ gơ̆r, gô vei sơ đơ̆ng tơ drong hơ len lăng đei tơ tĕnh, sơ đơ̆ng, hŭt đei dôm F0 tŏk bŏk hơ mơt lơ̆m tơ pôl:

“ Jang kiơ̆ tơ chơ̆t 16 ‘noh jĭ kơ̆m ưh kơ ăn bơ ngai hơ yơ lĕch tơ̆ trong, ưh kơ jô̆ dôm bơ ngai bơ̆ jang. Păng, ‘năr 01/9 gô ưh kơ đeitơ drong jang akŏm tơ̆ hnam trưng, pơ dơh đĭ đăng dôm tơ drong hŏk pơ hrăm. Năm tơ̆ kơ chơ ‘noh đei rim khŭl grŭp tơ pôl, drŏ kăn, hơ druh tơ dăm gô năm tơ̆ kơ chơ tơ gŭm kon pơ lei truh tơ̆ rim kueng kơ phô̆, pơ lei pơ la. Lơ̆m pơ lei tơm gô hơ len lăng tơ rih kiơ̆ mâu hơ dai đơ̆ng đĭ đăng rim ŭnh hnam, lơ̆m  5-7 năr gô jang đang”.

Prăt 2 giĕng âu ki, Covid-19 tơ̆ Dak Lak đei ƀôh tôch kơ hli bơ ngơ̆t. Ưh khan lăp anih kơ drơ̆m Buôn Ma Thuột lơ kon pơ lei mă rim xăh tŏ sĕt kon pơ lei, nhen xăh Cư Bao (thị xã Buôn Hồ), xăh Cư Né (apŭng Krông Buk) păng xăh Ea Nam (apŭng Ea H’Leo) kŭm đei ƀôh hơ nih jĭ tơ poh lơ̆m tơ pôl, hăm hloh 150 ‘nu ƀơm jĭ.

Mĭnh hơ nih ‘nao đei pơ vang găn tơ̆ xăh Cư EBua- pơ lei tơm Buôn Ma Thuột

Tơ drong atŭm tơ̆ dôm hơ nih tơ poh âu ‘noh tă kơ ƀơm truh tơ drong jang đơ̆ng rim anih jang mơ dro sa đei mơ dro sa hơ nơ̆ng hăm dêh char, pơ lei tơm tŏk bŏk đei jĭ Covid-19 đei ƀôh kơ tang. Kơ plăh tơ chă ăn ƀôh, tŏk bŏk đei lơ tơ drong glăi lơ̆m dăr hơ len bơ ngai huơ̆r gre, gre, tơ klep kơ tơ̆ng ang đơ̆ng rim dêh char păng đơ̆ng rim khŭl jang ƀơm truh. Nhen tơ̆  thị xã Buôn Hồ, đơ̆ng rŏng vă jê̆ 1 giĕng đei ƀôh hơ nih 57 ‘nu jĭ, tơ drongt ơ chă oei dơ̆ng tơ̆ 1 anih jang mơ dro sa, yua ưh kơ đei kơ tơ̆ng ang găh bơ ngai huơ̆r gre năm iŏk tăh tơ mam tơ̆ anih jang mơ dro sa âu dôm năr blŭng khei 8. Thiếu tá Trần Ngọc Tú – Kơ dră khŭl kanh sat vei lăng trong nơ năm kơ sô̆ 1, Anih kanh sat vei lăng trong nơ năm Kŏng an dêh char Dak Lak, kŭm hăm rim khŭl jang kơ pal jang tơ drong jang tơ̆ Hơ nih vei lăng gơng 110, vei lăng bơ ngai, gre đơ̆ng găh tu mơ̆t lơ̆m dêh char tơ băt, dang ei tơ drong hơ nat tơ chă hlôi đei hơ met ‘lơ̆ng gơ nang đơ̆ng kơ măy pơ̆ih mã QR ‘moi kiơ̆ điện thoại hơ gei.

“Kơ plăh doh ‘noh tam mă lei kơ măy ‘noh. Dang ei ‘noh hlôi pơ̆ih mã QR ngăl. Gre truh ‘noh adoi athei quét mã QR, păh jang pơ gang hai, păh Anih tơm vei lăng kŏng an hai. Ƀơ̆t mă pơ̆ih ‘noh đei tôm tĕch đĭ dôm tơ drong kơ tơ̆ng ang.”

Tơ̆ hơ năp đei ƀôh krê hơ mơt đơ̆ng jĭ hơ buh, hop akŏm Anih pơ gơ̆r jang tang găn jĭ Covid-19 dêh char Dak Lak, ƀok Phạm Ngọc Nghị, Kơ dră Anih vei lăng kon pơ lei dêh char akhan, oei đei tơ drong pơm pơ hơi đơ̆ng kon pơ lei păng đơ̆ng khŭl jang kơ pal. Kŭm hăm athei vei kơ jăp trong jang ki luơ̆t, hơ tŏk loi dơ̆ng tơ roi tơ băt krao hơ vơn kon pơ lei hơ tŏk ‘lơ̆ng đon băt kơ chăng tang găn jĭ, rim tơ ring lơ̆m dêh char athei hơ met ăn tôm ăn dôm tơ drong mơ mat tat hloh gô đei ƀôh vă đei trong jang hơ dăh, tơ tom. Ƀơ̆t măt, Dak Lak gô hơ tŏk tơ drong jang iŏk - hơ met jĭ Covid-19 tơ̆ Hnam pơ gang đa khoa Krông Buk đơ̆ng 100 tŏ giơng tŏk 200 tŏ giơng; hơ met ăn dơ̆ng 2 hơ nih ăn oei hơ drô̆ akŏm tih tơ̆ Buôn Ma Thuột, tôm hơ nih ăn kơ dang 1.300 ‘nu. Păng kiơ̆ kơ ƀok Phạm Ngọc Nghị, tơ drong kĕ hơ met jĭ Covid-19 tơ̆ tơ ring kŭm athei đei hơ tŏk:

“Athei hnam pơ gang Đa khoa tơ ring kăl hơ met ăn dơ̆ng 500 tŏ giơng, yua kơ bơ̆n oei athei vang tơ gŭm ăn rim dêh char Tây Nguyên dơ̆ng. Kăl athei hơ met ăn  hơ nih, tơ mam hơ drol. Oei tơ̆ rŏng, mưh đei bơ ngai jĭ ‘noh bơ̆n gô hơ nơ̆ng hơ tŏk loi dơ̆ng bơ ngai jang. Lơ̆m hơ met ‘noh hơ drin lê̆ bơ ngai jĭ truh tơ̆ng 2 ‘noh lĕch brŏk đơ̆ng hnam pơ gang bơ̆ih. Oei lê̆ truh tơ̆ng 3 lăp jing tơ drong vă kơ hrăp đĕch”.

La kak hơ len lăng hơ mơt jĭ Covid-19 tơ̆ xăh tơ̆ Đak Lak

Kiơ̆ kơ Anih vei lăng tơ drong jĭ jăn dêh char Dak Lak, tơ̆ dêh char đei 1 apŭng găh tơ ring jơk - tơ ring sơ đơ̆ng. 8 apŭng lơ̆m tơ ring dreng - tơ ring hơ mơt; 3 apŭng, 1 thị xăh păng pơ lei tơm Buôn Ma Thuột, ‘noh jĭ tơ ring đei krê hơ mơt lơ, păng apŭng Krông Buk tơ̆ tơ ring ƀrê - đei krê hơ mơt tôch kơ dêh. Lơ̆m kơ nao kung ‘nao tơ jră jĭ Covid-19, Buôn Ma Thuột păng Krông Buk hlôi ăn oei hơ drô̆ kơ hret đơ̆ng kơ sơ̆ ‘năr 26/8. Tơ drong hơ len lăng akŏm kŭm pơ tơm đei tơ lĕch jang. Lơ̆m noh, Buôn Ma Thuột pơ tơm hơ len lăng lơ̆m pơ lei tơm păng apŭng Ea Kar pơ tơm hơ len lăng tơ̆ đĭ đăng rim pơ lei bơ ngai kon kông. Kon pơ lei Dak Lak hơ mĕng dôm tơ drong hơ drin ‘nao gô tơ gŭm jăh tơ klăh dôm F0 đei hơ mơt lơ̆m tơ pôl, pơ tôch tơ drong đei ƀôh dôm hơ nih bơ ngai tơ poh jĭ lơ, tơ gop tang găn đei yua hăm jĭ hơ buh Covid-19.

VOV Tây Nguyên

Thuem: Tơ blơ̆