VOV4.Bahnar - Dêh char Dak Lak dang ei đei 19 tŏ Hnam kơ măy unh điên, đei kơ sư̆k dang 825 MW, đak đei mong tơ̆ rim dơ nâu hlŏh 1,3 ti met khô̆i. Dang ei oei tŏk bŏk pơ yan ‘mi kial, rim hnam kơ măy unh điên jang hơ doi kơ jăp hăm khul jang kơ pal kơ chăng tơ lĕch trong vei kơ jăp dơ nâu đak kŭm nhen ăn kơ măy unh điên kơ dâu lăp ‘lơ̆ng, mă loi ƀât mă jĭ Covid – 19 oei tơ pŏh tôch hơ mơt hrei ‘nâu.

Dêh char Dak Lak kơ chăng dăr lăng dơ nâu đak dôm Hnam kơ măy unh điên lơ̆m pơ yan ‘mi kial

Kiơ̆ ƀok Trương Công Hồng – Phŏ Kơ dră vei lăng jang kơ măy, tĕch mơ dro dêh char Dak Lak, kiơ̆ đơ̆ng chă hơ len năng adrol kơ pơ yan ‘mi kial, rim hnam kơ măy unh điên adoi bơ̆ jang tôm păng pơm kiơ̆ ‘lơ̆ng dôm tơ drong hơ găt vei lăng sơ đơ̆ng dơ nâu đak; pơ jing trong tơ jră hăm ‘mi kial, ăn kơ măy unh điên kơ dâu sơ đơ̆ng ‘lơ̆ng; jang hơ doi hăm dôm tơ ring vei lăng ‘lơ̆ng trong pơ chŏh đak jur tơ̆ tơ ring pơ băh. Yoa jĭ Covid – 19 oei tôch hơ mơt, dôm hnam kơ măy athei bơ̆ jang ‘lơ̆ng dôm trong jang tang găn jĭ, vei lăng sơ đơ̆ng tơ drong bơ̆ jang kŭm nhen tang găn jĭ păng tang găn sar bar tŏ ‘mi kial kơ nê̆.

Dơ̆ng: Tơ blơ̆