VOV4.Bahnar - Anih vei lăng pôk rơ̆ih dêh char Dak Lak tơ băt, lơ̆m dêh char gô đei 1.794 hơ nih tăh kơ phiê̆u hăm 1.802 hơ nih tăh kơ phiê̆u pôk rơ̆ih Kuôk hô̆i jăl 15 păng bơ ngai tang măt jơ nŭm pơ gơ̆r kon pơ lei dêh char jăl jang 2021-2026. Tơ̆ hơ năp tơ drong jĭ đei ƀôh krê hơ mơt, rim trong jang vei sơ đơ̆ng tang găn jĭ Covid-19 tơ̆ rim hơ nih âu gô đei tơ lĕch jang kơ jăp, vei sơ đơ̆ng ‘lơ̆ng ăn năr pôk rơ̆ih vă jê̆ truh. Anih jang pơ gang dêh char Dak Lak tŏk bŏk răp hơ len tơ drong tơ plih đơ̆ng jĭ COVID-19 lơ̆m păng ‘ngoăih teh đak; vei sơ đơ̆ng tơ drong jang hơ dai kơ jăp đơ̆ng Anih pôk rơ̆ih păng Anih pơ gơ̆r jang tang găn jĭ COVID-19 rim tơ ring.

Kơ dră chĕp kơ̆l dêh char Dak Lak hơ len lăng tơ drong jang pôk rơ̆ih tơ̆ rim tơ ring

Anih jang kơ pal hơ met ăn bơ ngai jang, gre, tơ mam, pơ gang vă pơm lăp hăm tơ drong jang tang găn jĭ COVID-19 lơ̆m khei ‘năr pơ gơ̆r ‘măng pôk rơ̆ih. Anih vei lăng pôk rơ̆ih dêh char Dak Lak athei rim tơ ring rơ̆ih dôm hơ nih tăh kơ phiê̆u pơm lăp hăm ‘mĕh vă tang găn jĭ hơ buh, đei hơ nih să, rơ hơi hiôk, vă jang kiơ̆ ngôi hơ tăih băl mư̆h tăh kơ phiê̆u. Đĭ đăng bơ ngai tăh hla păng bơ ngai pơ vih pơ văn pôk rơ̆ih athei gom muh măt, ôp ti rơ goh.

Thuem: Tơ blơ̆