VOV4.Bahnar – Dêh char Đăk Lăk dang ei đei hloh 209 rơbâu ha ka phê, đei yua rim xơnăm hloh 500 rơbâu tâ̆n, jing tơdrong pơyua tơm kơ hrĕng rơbâu unh hnam kon pơlei jang mir. Vă tang găn tơdrong klĕ tơtông, vei xơđơ̆ng mŭk drăm ăn bơngai pơtăm ka phê, rim anih jang kơpal păng khul vei lăng pơlei pơla tơ̆ dêh char tŏk bŏk hăt hot tơlĕch dôm trong jang tơnăp.

 Hơnơ̆ng 3 ‘măng lơ̆m minh giĕng đơ̆ng rŏng kơ xŏng đang ăh kơmăng, ƀok Trương Văn Đệ, oei tơ̆ thôn 3, xăh Ea Kpam, apŭng Cư M’gar hơmet ao tơnŏ, khŏ ƀôt, môk, unh pil... atŭm hăm rim bơngai lơ̆m khul vei lăng thôn pơlei năm hơlen mir ka phê. Ƀok Đệ tơroi, mir ka phê kơ unh hnam ăh jê̆ hơtuch thôn 3, ataih đơ̆ng tơring kon pơlei oei xa noh ƀônh ƀơm đe tơtông. Kơyuơ noh, đơ̆ng blŭng khei 10, ăh mă plei ka phê pơtơm kră, khul vei lăng thôn athei năm hơlen vei lăng: “Xơnăm xơ̆ unh hnam inh ƀơm đe tơtông pĕ pơhlom 40 tơm ka phê, hơkŏp đei hloh 20 kơƀao plei. Hli kơ đe tơtông, unh hnam chă hơpăh đe pĕ hrôih, mă lei kơyuơ plei tam mă đum đĭ pơm ăn hlŏng ka phê ưh đei lơ. Khul tơtông pĕ pơm tơgơ̆ lơ xơdrai, phơ phŏ yua hloi xăng kăt hloi xơdrai plei vă kơ ƀônh, pơrăm truh kơ plei pơyan đơ̆ng rŏng. Xơnăm âu đei ‘nhŏng oh lơ̆m khul vei lăng thôn pơlei tơgŭm chă gak hơlen noh ưh đei ƀơm tơtông bơih, unh hnam inh lê̆ đum ‘mơ̆i pơtơm pĕ”

Jâ̆p xăh Ea Kpam đei hloh 1.200 ha ka phê, lang xă truh xơlam teh kơ plei tơm Buôn Ma Thuột păng thĭ xăh Buôn Hồ. Thiếu tá Lưu Quang Chiến – Kơdră Kŏng ang xăh Ea Kpam, apŭng Cư M’gar ăn tơbăt, tơ̆ dôm hơgăt ka phê tơkuh, khul tơtông hơnơ̆ng pĕ, pơm tơxŭl tơxăl tơpôl, pơrăm mŭk drăm kon pơlei. Xơnăm âu, kŏng ang xăh jang atŭm hăm dôm anih jang, jơnŭm tơpôl akŏm đei 8 khul vei lăng tơ̆ dôm thôn pơlei, tơlĕch chă hơlen noh ka phê kon pơlei đei vei xơđơ̆ng: “Kŏng ang xăh hlôi tơlĕch truh rim khei vei lăng chă hơlen ăh kơmăng tơ̆ mir pơgar rơnguơ̆ ưh gan đei bơngai mă hơnơ̆ng đei ƀôh đe tơtông ka phê vă tang găn. Atŭm hăm noh, chă tơbang kơtơ̆ng ang tơroi tơbăt găh khul tơtông vă kon pơlei kơchăng. Hơlen lăng dôm bơngai ‘nao lĕch đơ̆ng hnam phak, hơnơ̆ng tơtông mŭk drăm đe nai vă chă pơtho akhan, đơ̆ng noh dôm bơngai âu pă đei pơm yoch bơih”

Dêh char Đăk Lăk dang ei đei hloh 209 rơbâu ha ka phê, đei yua hloh 500 rơbâu tâ̆n, noh rim ăh pơyan pĕ yua, adoi đei lơ khul jang vei lăng. Kiơ̆ kơ thượng tá Nguyễn Văn Quý – Phŏ Kơdră Anih Kanh sat Hinh sư̆ Kŏng ang dêh char Đăk Lăk, atŭm hăm khul vei lăng tơ̆ tơring, kŏng ang dêh char tơlĕch lơ trong jang, vă phă tơpăi lê̆ khul tơtông tơmam pơtăm, hơmet pơ ‘lơ̆ng tơdrong tĕch răt, vei xơđơ̆ng tơpôl tơ̆ tơring: “Anih Kanh sat Hinh sư̆ Kŏng ang dêh char axong khul jang năm truh dôm tơring mă hơnơ̆ng đei tơtông tơmam pơtăm vă jang atŭm hăm kŏng ang dôm apŭng, thĭ xăh, plei tơm chă hơlen, phă tơpăi, rôp vei dôm bơngai hơnơ̆ng chă tơtông tơmam pơtăm ăh blŭng pơyan iŏk yua. Tơlĕch chă tơroi tơbăt kơchăng vei lăng mi\k drăm kon pơlei; kơdih vei lăng tơnăp dôm bơngai mă đe nhôm pơm glăi; tơbăt hăm dôm anih tĕch răt tơmam choh pơtăm ưh kơ răt tơmam mă ưh kơ băt tơm a hla chă hơdăh...”

Lan chih păng pơre nơ̆r