VOV4.Bahnar  –‘Năr dơ̆ng năr 9/8, dêh char Đăk Lăk hlôi akŏm khul pơm jang năm xơng 478 bơngai jang đơ̆ng plei tơm Hồ Chí Minh chôt vih tơ̆ tơring vă tang găn hơbuh pơrang jĭ.

‘Nâu jing ‘măng mă blŭng Đăk Lăk tơlĕch akŏm khul jang năm truh tơring hơbuh pơrang jĭ vă xơng bơngai jang chôt vih. 478 ‘nu chôt vih ‘măng mă âu đei axong adrol hloh noh bơngai ‘lŏ kră, đe hơ ioh, đe drăkăn oei hơnăp, drăkăn oei tơmơ̆m kon iĕ tơ̆ hơla 36 khei; bơngai năm khăm hơmet jĭ, năm apong đe ‘nhŏng oh, năm jang mă tam gơh brŏk; bơngai đei xa tơdrong tơgŭm đơ̆ng tơpôl rim khei; unh hnam năm hadoi hăm đe hơ ioh tơ̆ hơla 10 xơnăm, bơngai kră, drăkăn oei hơnăp, bơngai jĭ... ‘meh vă chôt vih tơ̆ tơring kơdih. Kon pơlei đei xơng brŏk noh athei đei hla bar test renh pơkăp âm tĭnh hăm COVID -19. Đơ̆ng rŏng kơ chôt vih tơ̆ tơring, bơngai jang apŭng yơ athei chôt vih pơm kiơ̆ pơkăp oei tơklăh minh ƀôt tơ̆ apŭng noh lơ̆m 14 năr păng pơtoi pơm kiơ̆ pơkăp oei tơklăh tơ̆ hnam 7 năr. 22 tong gre chơ bơngai jang chôt vih ‘măng mă âu đei Anih jang Phương Trang tơgŭm tôm kơsô̆ jên huach.  

Lan chih păng pơre nơ̆r