VOV4.Bahnar – Pơm kiơ̆ Tơchơ̆t đơ̆ng Anih jang Kơpal dêh char Đăk Lăk, đơ̆ng xơnăm 2004 truh dang ei 1.194 anih jang tơ̆ Đăk Lăk hlôi tơguăt hăm 758 pơlei kon kông. Đơ̆ng rŏng jê̆  17 xơnăm tơguăt, hăm dôm tơdrong jang tơgŭm kăp gĭt, um ai pơlei pơla roi năr roi tơplih, tơdrong erih kon pơlei roi năr roi đei hơtŏk, kơsô̆ unh hnam hin dơnuh tơjur hơdăh.

Nhôn atŭm hăm đe kang ƀô̆, bơngai jang kơ Kŏng ti Unh hơyuh Đăk Lăk truh apong pơlei pơm 'nhŏng oh M’briu, xăh Cư Né, apŭng Ea Kar. Ƀơ̆t 'măng âu, đe đoan viên kơ anih jang axong che gom ƀŏ y tê̆, đak pơgang ôp ti, tơmam xa, păng tơroi pơtho găh dôm trong tang găn păng tơjră pơrang jĭ Covid – 19 ăn kon pơlei. Atŭm hăm noh, tang măt ăn Jơnŭm pơgơ̆r Kŏng ti adoi axong ăn 2 tŏ rơmo yŏng đei kơjă 40 trĭu hlj ăn 2 unh hnam hin dơnuh lơ̆m pơlei.

          Ƀok Y Suk Niê – Ƀĭ thư Chi ƀô̆ pơlei M’Briu, xăh Cư Né tơroi, dôm xơnăm adrol ki tơdrong erih kon pơlei oei lơ tơnap tap, kơsô̆ unh hnam hin dơnuh oei lơ, đei tơdrong tơgŭm pơm jang đơ̆ng Đảng păng Teh đak, tơdrong tơgŭm đơ̆ng anih tơguăt tơgŭm, dang ei kơsô̆ âu tơjur oei pă hơla 5%. Lơ̆m 'măng pơrang jĭ Covid – 19 hơbuh hli ăh khei 9/2021, pơlei xơng 146 'nu bơngai pơm jang tơ̆ dôm dêh char găh pơbăh chôt vih kơdâu kơ pơrang jĭ, dôm jăl jang tơ̆ tơring păng Kŏng ti Unh hơyuh Đăk Lăk hlôi truh tơgŭm: “Kŏng ti Unh hơyuh Đăk Lăk pơm 'nhŏng oh hăm pơlei M’briu đơ̆ng xơnăm 2004 păng đei lơ tơdrong jang tơgŭm. Kŏng ti hơnơ̆ng tơrĕk apinh jet gia, axong tơmam lơ̆m lêh têt trung thu, têt 'nâu nai; tơgŭm kon pơlei găh hnam oei, phe xŏng ăh khei tơjê̆ kăt ƀa dăh mă axong rơmo ăn unh hnam hin dơnuh. Dar deh unh hnam hin dơnuh lơ̆m pơlei ƀôh tơjur. 'Măng hơbuh pơrang jĭ âu đe xư truh axong ăn che gom ƀŏ, pơgang ôp ti; tơroi pơtho kon pơlei tang găn păng tơjră pơrang jĭ dăh mă pơm kiơ̆ ƀlep pơkăp 5K đơ̆ng Anih tơm y tê̆, chô̆ che gom ƀŏ, ưh đei akŏm lơ bơngai. Kon pơlei pơm kiơ̆ tơnăp noh truh dang ei pơlei tam mă đei bơngai yơ ƀơm F0”

Pơlei M’briu, xăh Cư Né, apŭng Ea Kar dang ei đei 268 unh hnam hăm hloh 1.300 măt bơngai, hloh 95% noh bơngai Ê đê. Ƀok Trần Văn Thuận – Kơdră Kŏng ti Unh hơyuh Đăk Lăk ăn tơbăt, kiơ̆ Tơchơ̆t đơ̆ng Anih Kơpal dêh char Đăk Lăk, xơnăm 2004 kŏng ti hlôi pơm 'nhŏng oh hăm pơlei M’briu. Vă tơgŭm pơlei pơm 'nhŏng oh, rim xơnăm ăh 'năr lêh 'năr têt, kŏng ti năm apong, hơlêm đon bơnôh, axong tơmam ăn unh hnam hin dơnuh, unh hnam mă teh đak tơchơ̆t tơgŭm; pơjing dôm tơdrong jang hơdăh vă tơgŭm kon pơlei hơtŏk jang mŭk drăm, xut lê̆ pơngot tơjur hin dơnuh: “Kiơ̆ pơkăp pơm 'nhŏng oh noh rim xơnăm anih jang hlôi tơlĕch lơ tơdrong jang, rim xơnăm axong pơyua ăn tơpôl păng tơrĕk truh dôm unh hnam mă teh đak tơchơ̆t tơgŭm, unh hnam tơnap tap vă hơtŏk mŭk drăm. Hăm pơlei M’Briu dôm tơdrong tơnap tap oei đei dang ei tơ̆ pơlei noh anih jang hlôi băt hơdăh dôm tơdrong jang vă tơgŭm tơnăp ăn kon pơlei lơ̆m pơjing pơlei pơla erih hiôk hian trŏ pơkăp”

Pơlei B’hôk, xăh Yang Tao, apŭng Lăk duh pơm 'nhŏng oh hăm Anih jang Rađiô nơ̆r pơma Việt Nam tơ̆ Tây Nguyên (VOV-Tây Nguyên) đơ̆ng xơnăm 2004. Pơlei dang ei đei jê̆ 270 unh hnam hăm hloh 1.000 măt bơngai, mă lơ noh kon pơlei M’nông. Kiơ̆ kơ ƀok Y Mor Kuăn – kơdră pơlei B’hôk, đơ̆ng mă pơm 'nhŏng oh, VOV – Tây Nguyên hơnơ̆ng yak hadoi, tơgŭm kon pơlei. Atŭm hăm noh truh apong, axong tơmam lơ̆m dôm 'năr lêh 'năr têt, VOV Tây Nguyên hlôi hơvơn dôm anih jang mŭk drăm man axong ăn 5 tŏ hnam 'mêm kơ eng hăm kơjă 400 trĭu hlj ăn dôm unh hnam hin dơnuh, unh hnam mă teh đak tơchơ̆t tơgŭm. Ăh pơrang jĭ Covid -19 hơbuh hli ăh jê̆ đĭ khei 9/2021, pơlei xơng jê̆ 200 'nu bơngai năm jang tơ̆ ataih chôt vih kơdâu kơ pơrang, lơ̆m kơsô̆ âu đei bơngai ƀơm jĭ, đang kơ noh tôm pơlei ƀơm pơkăp oei tơklăh, tang măt ăn VOV – Tây Nguyên hlôi truh tơgŭm kon pơlei: “Pơlei  B’hôk pơm kiơ̆ pơkăp pơvei 14 năr, ưh gơh năm jang, ưh kơ măh tôm tơdrong. Anih tơguăt pơm 'nhŏng oh noh VOV – Tây Nguyên truh axong tơmam ăn rim unh hnam 10 kĭ phe, 1 kơchai rơmă, 1 kơdŭng ƀôk ngok, đak măm, ka kro; atŭm hăm che gom ƀŏ y tê̆, pơgang ôp ti... Kon pơlei xô̆ hơ̆k, kon pơlei xơđơ̆ng jơhngơ̆m găn hloh khei năr tơnap tap hrat hrĭn oei tơklăh”

Vũ Nam Trang, chih kơtơ̆ng ang ăn VOV Tây Nguyên ăn tơbăt, lơ̆m 'măng pơrang jĭ hơbuh hli ăh xơnăm 2021, atŭm tơgop tơgŭm noh Khul jang Kŏng đoan kơ anih jang oei hơvơn dôm anih jang 'mêm bơnat chă tơgŭm anih jang y tê̆ Đăk Lăk hloh 200 trĭu hlj răt tơmam drăm y tê̆, pơgang 'măn ăn tơdrong tang găn păng tơjră pơrang jĭ; axong jê̆ 5tâ̆n tơmam xa ăn kon pơlei pơm 'nhŏng oh B’hôk lơ̆m khei năr pơlei pơm kiơ̆ pơkăp oei tơklăh: “Hăm xơnong jang kơ minh 'nu chih kơtơ̆ng ang noh nhôn hơnơ̆ng tơroh tơdrong hơvơn dôm anih jang 'mêm bơnat tơgop jơhngơ̆m vă tơgŭm ăn kon pơlei tơring ataih yaih, tơring pơm kiơ̆ pơkăp pơvei kơyuơ đơ̆ng pơrang jĭ Covid - 19. Duh pŭn ai đe xư hơnơ̆ng tơgŭm yak hadoi hăm nhôn vă năm truh dôm tơring ƀơm pơvei , tơring ataih yaih vă axong tơmam ăn kon pơlei ƀơm răm đơ̆ng pơrang jĭ Covid – 19.”

Jê̆ 17 xơnăm kơ âu, hăm tơdrong tơgŭm đơ̆ng Kŏng ti Unh hơyuh Đăk Lăk păng VOV – Tây Nguyên, ƀar pơlei pơm 'nhŏng oh M’briu păng B’hôk hlôi đei lơ tơplih hơdăh, tơdrong erih đei hơtŏk, mă kăl noh lơ̆m khei năr pơrang jĭ Covid – 19 hơbuh hli hlơt âu ki.

Lan chih păng pơre nơ̆r