VOV4.Bahnar – Đơ̆ng rŏng kơ dôm F1 đei 3 'măng iŏk hơlen pham đei pơkăp âm tĭnh hăm virus SARS-CoV2, hloh 140 'nu kon pơlei lơ̆m tơring pơvei iŏk hơlen pham adoi pơkăp âm tĭnh, pơgê năr 26/5, Anih vei lăng kon pơlei dêh char Đăk Lăk hlôi tơchơ̆t yuih lê̆ tơchơ̆t pơvei hăm tơring oei xa ăh trong iĕ 189/1 Mai Hắc Đế, phương Tân Thành, plei tơm Buôn Ma Thuột, dêh char Đăk Lăk – anih mă đei 2 'nu ƀơm jĭ COVID -19.

Kon pơlei chot ho ia xơng iŏk hla bar yuih pơvei

Yă Trần Thị Dinh, Phŏ Kơdră Anih vei lăng kon pơlei phương Tân Thành ăn tơbăt, lơ̆m khei năr tơklăh oei pha, atŭm hăm axong khul jang vă vei xơđơ̆ng tơpôl, xơđơ̆ng tơdrong tang găn păng tơjră pơrang jĭ, jơnŭm pơgơ̆r tơring hlôi hơvơn dôm anih jang 'mêm bơnat chă tơgŭm tơmam drăm kăl vă vei xơđơ̆ng ăn tơdrong erih kon pơlei. Kiơ̆ kơ yă Trần Thị Dinh, lơ̆m khei năr truh, mă hlôi yuih tơchơ̆t pơvei, tơring pơtoi đei trong chă hơlen jơhngơ̆m jăn dôm bơngai lơ̆m tơring âu vă dăh tom hơmet ming mưh đei tơdrong đei ƀôh hli.  

Lan chih păng pơre nơ̆r