VOV4.Bahnar - Ŭh kơ măh đak sŏ nhă tŏk bŏk pơm ăn tơdrong erĭh sa vă jê̆ 500 ŭnh hnam oei tơ̆ Dak R’la, apŭng Dak Mil, dêh char Dak Nông mơ hoal mơ huônh. Lơ ŭnh hnam măh tơchă đe koel đak koai trŭh mơjĭt trĭu hlak jên mă lei oei ư̆h kơ đei đak ‘mơ̆i.

Kon pơlei tơra jên răt đak sŏ nhă

Hlŏh 1 khei au ŭnh hnam yă Trần Thị Bích Phượng atŭm hăm lơ ŭnh hnam oei tơ̆ thôn 5, tơring Dak R’la măh chă tơra kon jên rim năr, răt trŭh rơbau kơlich đak đơ̆ng nŏh chă klăh asong dĭh băl kơ yuơ rim đak koai hrơ̆ hroi. Yă Phượng tơbăt, tơdrong ư̆h kơ măh đak sŏ nhă pơm ăn tơdrong erĭh sa kơ yă tôch mơmat tat. Ŭnh hnam ayơ jei ăn mĭnh ‘nu bơngai lơ̆m ŭnh hnam oei tơ̆ hnam vă iŏk đak.“Kon pơlei tơ̆ au nhen lĕ ư̆h kơ măh đak ngăl păng măh răt iŏk đak đơ̆ng anai. Lơ̆m mĭnh năr nhôn răt đak rơgŏh sŏ nhă đĭ 1.500 kơlich, tơdăh ư̆h kơ răt đak ‘nŏh ư̆h kơ đei đak vă sŏ nhă. Nhôn hơpơi kơdră kơpal pơm lơ liơ tơgŭm djru dăh mă ba ăn nhôn đak sŏ nhă rơgŏh vă kon pơlei đei đak sŏ nhă, sơđơ̆ng tơdrong erĭh sa”.

Ư̆h khan lăp chă răt đak đơ̆ng đe vă sŏ nhă, unh hnam yă Phạm Thị Vân, oei tơ̆ thôn 3, tơring Dak R’la oei tơlĕch mơjĭt trĭu hlak jên hơvơ̆h đei sir đak koai koer. Yă Vân tơbăt, ŭnh hnam ayơ pŭn ai ‘nŏh koer đei đak mŏng găh lơ ŭnh hnam koer đak koai trŭh kơ hrĕng met mă lei ư̆h kơ đei đak.“Tơring au tơdrong chă sir sơlŭng đak tôch mơmat tat. Ŭnh hnam nhôn hlôi tơlĕch 40 trĭu hlak jên vă sir koer đak koai mă lei mơmat tat dêh. Măh 2 trŭh 3 năr ŭnh hnam mă ƀôm đei đak ƀĕnh thŭng mong đak tơgŭm ăn sŏ nhă. Dang ei ŭnh hnam nhôn jei oei răt đak đơ̆ng đe vă sŏ nhă kơ ‘năr”.

Mĭnh ƀar ŭnh hnam tơlĕch kon jên sir đak koai koer tơchă đak

Jei lei lăi, tơ̆ thôn 2 kơ tơring au hrei au đei 30 ŭnh hnam hơvơ̆h đe koer đak koai, ‘nŏh 28 tŏ đak koai koer ư̆h kơ đei đak. 3 tŏ đak koai koer đei tĕh đak koer ăn đơ̆ng lơ sơnăm au ki, jei hlôi krơ̆ hroi ngăl.

Kiơ̆ đơ̆ng Dơnŏ anĭh vei lăng kon pơlei tơring Dak R’la chĭh jô̆, lơ̆m tơring dang ei đei 500 ŭnh hnam, hăm 1.500 ‘nu bơngai tŏk bŏk ư̆h kơ măh đak sŏ nhă, găh lơ akŏm lơ̆m thôn 2,3 păng 5. Ƀok Ngô Quang Văn, Kơ iĕng Kơdră chĕp pơgơ̆r Dơnŏ anĭh vei lăng kon pơlei tơring Dak R’la hơlen, rim pơlei lơ̆m tơring jei tơring groi, atăih kơ thoong đak. Lơ̆m mă nŏh, pơ đĭ lơ̆m tơring lăp đei 1 hơnĭh đak sŏ nhă rơgŏh tơ̆ thôn 7, kơna ư̆h kơ kĕ vă pơtrŭh ăn đak. “Tơring hlôi pơrô̆ athei kon pơlei hơmet pơ ‘lơ̆ng tơnap tap pơkom đak, iŏk yua trŏ ƀlep. Găh đunh đai tơring Dak R’la găh groi tĕh tơ̆ au chă sir đak koai koer ‘nŏh ư̆h kơ lăp ôh. Tơring hlôi apĭnh athei dehe char đei trong jang đunh đai ‘nŏh ƀôm iŏk đak rơgŏh đơ̆ng dơnau đak Đu Ri 2 tơ̆ thôn 5 păng pơlăp hơnĭh kmăi ƀôm đak găh rŏng Dơnŏ anĭh bơ̆ jang tơring vă pơtrŭh ăn rim pơlei”.

Tơdrong ưh kơ măh đak sŏ nhă lơ̆m pơyan phang tơ̆ tơring Dak R’la pơdui đunh đơ̆ng lơ sơnăm kơ au. Kon pơlei adoi nhen kơdră tơring tôch hơpơi ‘mĕh vă rim kơdră kơpal, rim hơnĭh jang hrôih tơgŭm djru kon jên iung jang vă kon pơlei lơ̆m tơring đei đak sŏ nhă, đei đak chă tơruih pơro ăn ‘long pơtăm.                                                                                        

Bơngai chĭh: Tuấn Anh

Tơblơ̆ nơ̆r: Amazưt