VOV4.Bahnar - Kơ dră Anih vei lăng kon pơ lei dêh char, Kơ dră Anih pơ gơ̆r jang tang găn jĭ tơ̆ bơ ngai dêh char Dak Nông hlôi kĭ tơ chơ̆t ưh kơ ăn yak vih vơ̆t pơ đĭ lơ̆m apŭng Dak Mil, tơ mơ̆t yua kơ tang dôm trong jang kiơ̆ tơ chơ̆t 16 đơ̆ng rŏng kơ đei ƀôh bơ ngai jĭ Covid-19 lơ̆m tơ pôl. Khei ‘năr jang kiơ̆ ưh kơ ăn yak vih vơ̆t pơ tơm đơ̆ng 10 jơ gơ măng ‘năr 14/9 ding truh đei tơ roi tơ băt ‘nao vă tang găn jĭ hơ buh.

Kiơ̆ tơ roi tơ băt đơ̆ng Anih pơ gơ̆r jang apŭng Dak Mil, ‘năr 13/9, Hnam pơ gang apŭng iŏk đei kơ tơ̆ng ang đei 1 ŭnh hnam tơ̆ kueng kơ phô̆ 2, thị trấn Dak Mil đei yuh, lap. Iŏk kơ mâu hơ len lăng RT-PCR, 4 ‘nu lơ̆m ŭnh hnam tă kơ đei jĭ vi rút SARS-Cov-2 ngăl. Kiơ̆ dăr hơ len yŏng jĭ, ŭnh hnam âu tĕch mơ dro plei ‘long, dang 10 năr hơ drol đei ngôi tơ jê̆ hăm bơ ngai huơ̆r gre chơ plei ‘long brŏk đơ̆ng pơ lei tơm Hồ Chí Minh. Lăp đơ̆ng rŏng kơ đei ƀôh dôm bơ ngai đei jĭ lơ̆m tơ pôl, apŭng Dak Mil hlôi tơ chơ̆t pơ vang găn 4 hơ nih đei bơ ngai jĭ, hơ dai hăm ba dôm bơ ngai jĭ Covid-19 mơ̆t tơ̆ hơ nih hơ met kơ Hnam pơ gang apŭng păng ba 164 F1 năm ăn oei hơ drô̆ akŏm.

Thuem: Tơ blơ̆