VOV4.Bahnar - Kiơ̆ đơ̆ng Dơnŏ anĭh vei lăng jang pơgang dêh char Dak Nông rim bơngai oei lơ̆m dêh char đei tơ ƀơ̆p oei tơ jê̆ hăm 2 ‘nu bơngai jĭ Covid-19 tơ̆ pơlei tơm Hồ Chí Minh, lăp đơ̆ng rŏng khăm hơlen ‘măng mă 1 jei ư̆h kơ đei ƀô̆h tơpŏh sơmach jĭ Sars-cov-2. Hơdrol kơ ‘nŏh, lăp đơ̆ng rŏng kơtơ̆ng ang 2 ‘nu bơngai jĭ kơsô̆ 13.498 păng 13.499 đơ̆ng pơlei tơm Hồ Chí Minh năm tơ̆ Kon Tum đei găn hlŏh dêh char Dak Nông tơpŏh jĭ Covid-19, đei tơ ƀơ̆p, oei tơ jê̆ hăm rim bơngai bơ̆ jang tơ̆ rim hơnĭh tĕch vĕ trong gre lơ̆m dêh char Dak Nông. Dơnŏ anĭh vei lăng jang pơgang dêh char Dak Nông hlôi tĕnh koăng năm tơchă 10 ‘nu bơngai đei oei tơ jê̆ păng iŏk pham khăm hơlen păng ăn oei hơdrô̆ akŏm vă vei lăng năng tông jơhngơ̆m jăn. Kiơ̆ đơ̆ng pơtôch khăm hơlen Realtime-PCR, 10 ‘nu bơngai đei tơ ƀơ̆p tơ jê̆ au jei ư̆h kơ ƀô̆h tơpŏh jĭ lơ̆m ‘măng khăm hơlen ‘măng mă 1. Dang ei, jơhngơ̆m jăn kơ rim bơngai ăn oei hơdrô̆ jei pran jăng grăng akau, khŭl ƀok thây pơgang tŏk bŏk chĭh hơnăn rim bơngai F2 vă ăn năm oei hơdrô̆ ‘moi kiơ̆ tơdrong tơchơ̆t.

Tơblơ̆ nơ̆r: Amazưt