VOV4.Bahnar - Kiơ̆ kơ Anih vei lăng pôk rơ̆ih dêh char Dak Nông, Jơ nŭm vei lăng pôk rơ̆ih teh đak hlôi drơ̆ng ăn kơ 12 kơ đông linh vei lăng tơ ring sơ lam păng Tiểu đoàn huấn luyện cơ động 19 lơ̆m dêh char Dak Nông pôk rơ̆ih hrôih 1 năr pơ têng hăm tơ drong hơ găt. Truh dang ei, tơ̆ rim anih jang khŭl linh vei lăng tơ ring sơ lam tơ drong jang hơ met ăn pôk rơ̆ih đei tơ lĕch jang ƀlep khei ‘năr hơ găt păng ƀlep Luơ̆t pôk rơ̆ih.

Đại tá Phạm Quý Vỹ, Phŏ Chính ủy, Anih tơm pơ gơ̆r Bô̆ đô̆i vei lăng tơ ring sơ lam dêh char Dak Nông tơ băt, khei ‘năr âu ki tơ̆ tơ ring sơ lam Việt Nam - Campuchia đei lơ tơ drong krê hơ mơt ư̆h kơ ê găh tơ drong jĭ Covid-19. Vă vei sơ đơ̆ng ăn ‘măng pôk rơ̆ih, khŭl linh vei lăng tơ ring sơ lam athei đei tăh kơ phiê̆u hrôih vă jang kiơ̆ tơ drong jang hơ dai vei lăng răh tơ ring sơ lam tang găn răh jĭ Covid-19.

Thuem: Tơ blơ̆