VOV4.Bahnar - Dêh char Dak Nông pơ gơ̆r ăn oei hơ drô̆ hăm đe thây kô, bơ ngai jang, hŏk tro tơ̆ Hnam trưng tĕh đak rong hŏk trong kon kông jăl 2 păng jăl 3 Đak R’Lấp, apŭng Đak R’Lấp đơ̆ng rŏng kơ ƀôh 1 ‘nu hŏk tro tơ pŏh pơ rang jĭ SARS-Cov-2.

Til pơ gê 5-9, hnam trưng Tĕh đak rong hŏk tro kon kông jăl 2 păng jăl 3 Đak R’Lấp, apŭng Đak R’Lấp, dêh char Dak Nông sơng đe ŏh năm pơm lêh mât hŏk sơ năm hŏk ‘nao. Kiơ̆ đơ̆ng pơ tŏ hơ yuh hơ kâu, hnam trưng ƀôh 1 ‘nu hŏk tro lăm 6 yuh, hiĕn. Test hrĕnh ăn hŏk tro âu ‘nŏh đei jĭ SARS-CoV-2.

Truh kơ sơ̆ 5/9, tơ drong set hơ len PCR chih hơ dăh hŏk tro âu đei virus SARS-CoV-2. Đơ̆ng rŏng kơ ‘nŏh, hnam trưng roi tơ băt ăn khul jang kơ pal pơ vang găn, pruih pơ gang pơ lôch pơ rang jĭ, pơ gơ̆r tơ chă dôm bơ ngai tơ ƀâp, ngôi jê̆ hăm bơ ngai jĭ. Atŭm hăm ‘nŏh athei 198 ‘nu hŏk tro tơ̆ 7 lăm păng 31 ‘nu kăn ƀô̆, thây kô, bơ ngai jang oei hơ drô̆ kơ tă tơ̆ hnam trưng.

Dơ̆ng: Tơ blơ̆