VOV4.Bahnar - Đơ̆ng rŏng khei ‘năr tang găn ưh ăn yak vih vât lơ̆m tơ pôl vă tang găn jĭ covid-19, dêh char Dak Nông đei nơ̆r asong pơ gơ̆r bơ̆ jang dơ̆ng lơ̆m tơ pôl đei kơ drâm bơ ngai, nhen tơ drong lêh, tơ drong jŏh ayŏ kơ dŏ xoang, tơ plŏng kơ dâu. Kŭm hăm ‘nŏh dêh char oei athẻi bơ̆ jang ‘lơ̆ng dôm trong jang tang găn jĭ, tơ jră ‘lơ̆ng hăm dôm tơ drong krê ‘nao đei.

Kiơ̆ Dơ nŏ anĭh vei lăng kon pơ lei dêh char Dak Nông, tơ drong asong pơih pơ gơ̆r dơ̆ng dôm tơ drong lêh, jŏh ayŏ kơ dŏ xoang, tơ plŏng kơ dâu, tơ drong ngôi pơ chơt đei kơ drâm bơ ngai ‘nŏh yoa đơ̆ng jĭ Covid-19 tơ̆ lơ tơ ring đei găn bơih. Vă pơm ‘lơ̆ng ăn tơ drong tang găn jĭ, Dơ nŏ anĭh vei lăng kon pơ lei dêh char Dak Nông athei anĭh chă tơ mang lăng tơ lĕch lơ trong tưk tơ iung chă tơ mang lăng, hơ doi hăm tơ lĕch trong tang găn jĭ Covid-19. ‘Ngoăih kơ ‘nŏh, Dak Nông tơ tă ăn kon pơ lei hơ nơ̆ng gom muh măt mưh lĕch đơ̆ng hnam, ngôi tơ̆ anĭh kơ drâm bơ ngai, hao gre; hơ nơ̆ng ôp ti hăm sơ ƀŏng dăh mă đak pơ gang pơ lôch pơ rang jĭ, ngôi dơ̆ng hơ tăih băl mă lăp.

Dơ̆ng: Tơ blơ̆