VOV4.Bahnar - Anih vei lăng pôk rơ̆ih dêh char Dak Nông hlôi đei Hla ar tơ roi kơ sô̆ 69 gơ̆ih kơ Jơ nŭm vei lăng teh đak găh tơ drong athei pơ gơ̆r pôk rơ̆ih bơ ngai tang măt Quốc hội jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026 hrôih 1 năr pơ têng hăm tơ drong hơ găt tơ̆ 1,2 anih jang khŭl linh vei lăng tơ ring sơ lam. Kiơ̆ kơ Anih vei lăng pôk rơ̆ih dêh char Dak Nông, khei ‘năr âu ki tơ̆ tơ ring sơ lam Việt Nam-Campuchia đei lơ tơ drong krê hơ mơt găh tơ drong jĭ hơ buh Covid -19. Dang ei kang ƀô̆, khŭl linh ƀô̆ đô̆i vei lăng tơ ring sơ lam dêh char Dak Nông tŏk bŏk akŏm bơ̆ jang kiơ̆ hơ dai, vei lăng răh tơ ring sơ lam tang găn răh jĭ hơ buh Covid -19. Lăng kiơ̆ Hơ păng 72, Luơ̆t pôk rơ̆ih bơ ngai tang măt Quốc hội păng Jơ nŭm vei lăng kon pơ lei, vă vei lăng kơ jăp tơ drong pơm tơm tơ ring sơ lam teh đak păng tang găn jĭ Covid -19, Anih vei lăng pôk rơ̆ih dêh char Đak Nông athei Jơ nŭm vei lăng pôk rơ̆ih teh đak ăn phep pôk rơ̆ih hrôih 1 năr tơ̆ 12 kơ đông linh vei lăng tơ ring sơ lam păng Tiểu đoàn pơ hrăm cơ động 19 (Anih tơm pơ gơ̆r Ƀô̆ đô̆i vei lăng tơ ring sơ lam dêh char).

Thuem: Tơ blơ̆