VOV4.Bahnar - Atŏk kơtang chĕp pơgơ̆r, pơrô̆ jang hơmet pơ ‘lơ̆ng tơhlăk tơhlĭn, lăp hlŏh 1 khei, dêh char Dak Nông hlôi tơlĕch kơtang kon jên tơmơ̆t jang tĕh đak, jơnei vă jê̆ 70%, lơ hlŏh jô̆ hơtŏ lơ̆m tĕh đak.

Jô̆ trŭh khei 10, dêh char Dak Nông hlôi tơlĕch kon jên tơmơ̆t jang tĕh đak 1.500 ti hlak jên, jơnei vă jê̆ 70% , kon jên tơmơ̆t jang đei pơjao lơ̆m sơnăm 2021. Tơdrong kăl vă pơma trŭh ‘nŏh hơdrol kơ ‘nŏh 1 khei, lơ̆m năr 25/8, dêh char tơlĕch kon jên jang tim mă trŭh 40%. Tơdrong “atŏk kơtang” lơ̆m ming man, pơtrŭh ăn kon jên jang ăn rim hơnĭh jang hăm kon jên tơmơ̆t jang đơ̆ng Tĕh đak ‘nŏh gơnơm trong chĕp pơgơ̆r, pơrô̆ jang kơtang ‘lơ̆ng hơ iă đơ̆ng Kơdră chĕp pơgơ̆r tơring. Dơnŏ anĭh vei lăng kon pơlei dêh char Dak Nông tơbăt, dang ei dêh char tŏk bŏk hơnơ̆ng dăr lăng, iŏk tơvĭh kon jên đơ̆ng rim tơdrong vă jang đei tơlĕch jên jang tŏ sĕt ăn rim hơnĭh vă jang ‘mĕh vă đei kon jên tơmơ̆t jang; dăr lăng, hơmet pơ ‘lơ̆ng tơhlăk tơhlĭn, rim tơring pơgĕnh ‘năr hơlăng lơ̆m dôm khei vă đĭ sơnăm vă atŏk kơtang tơ iung pơjing ming mang.

Tơblơ̆ nơ̆r: Amazưt