VOV4.Bahnar - Jô̆ truh ‘năr 13/7, dêh char Dak Nông đĭ đei 3 ‘nu bơ ngai jĭ covid-19. Tơ̆ hơ năp tơ drong jĭ Covid-19 oei tơ pŏh tôch hơ mơt, ưh kơ ê, tôch krê tơ pŏh xă, dêh char Dak Nông pơ gơ̆r jang kiơ̆ trong pơ vang găn lơ̆m dêh char kiơ̆ tơ drong tơ chơ̆t 15 đơ̆ng Thủ tướng tĕh đak pơ tơm đơ̆ng 12h00 ‘năr 13/7 truh đei nơ̆r pơ tho plơ̆ng dơ̆ng.

Kiơ̆ kơ ‘nŏh, dêh char Dak Nông ưh ăn ngôi akŏm đơ̆ng 20 ‘nu bơ ngai tŏk tơ̆ kơ pal. Ưh đei ngôi hơ dai đơ̆ng 10 ‘nu bơ ngai tŏk tơ̆ kơ pal tơ̆ ‘ngoăih kơ anih jang, hnam hŏk, hnam pơ gang; athei ngôi, dơ̆ng hơ tăih băl 2m tơ̆ anih kơ drâm lơ̆m tơ pôl. Tơ jur ƀiơ̆ gre kơ dâu vih vât, kơ sô̆ bơ ngai hao lơ̆m gre kơ dâu vih vât lơ̆m dêh char. Athei tơ jur ƀiơ̆ bơ ngai bơ̆ jang tơ̆ anih jang kơ tĕh đak, hơ tŏk tơ drong bơ̆ jang trư̆k tuyê̆n.

Hăm bơ ngai truh đơ̆ng plt Hồ Chí Minh (dang ei oei pơ vang găn kiơ̆ tơ drong tơ chơ̆t 16/CT-TTg) vih truh tơ̆ dêh char: athei set hơ len pham Realtime PCR tơ̆ dôm anih gak hơ len jĭ, anih ăn oei hơ drô̆ truh đei hla ar set hơ len ưh đei jĭ 'nŏh ăn vih oei hơ drô̆ tơ̆ hnam păng set hơ len Realtime PCR kiơ̆ tơ drong hơ găt đơ̆ng Anih tơm vei lăng jang pơ gang.

Dơ̆ng: Tơ blơ̆