VOV4.Bahnar - Ƀlep lơ̆m năr pơ gơ̆r mơ̆t hŏk ƀlŭng sơ năm hŏk ‘nao (5/9) âu ki,  anih jang kơ pal dêh char Dak Nông chă ƀôh 1 ‘nu hŏk tro jĭ Covid-19. Anih vei lăng găh pơ tho pơ hrăm tơ ring hlôi pơ dơh lê̆ ‘mơ̆i pơ gơ̆r pơ tho hŏk kơ tă tơ̆ rim hnam trưng. Hơ drô̆ hăm dôm Hnam trưng teh đak rong ‘me hŏk tro kon kông pơ gơ̆r ăn đe oh oei kơ tă tơ̆ hnam trưng păng athei vei lăng kơ jăp hŏk tro. Tơ̆ apŭng Đắk R’Lấp, khei ‘năr âu ki, khŭl kơ dră păng anih jang kơ pal hlôi đei lơ tơ drong jang tơ gŭm, pơ lung hŏk tro păng thây kô pơ tho lơ̆m tơ ring đei jĭ.

 Lăp đơ̆ng rŏng kơ đei ƀôh 1 ‘nu hŏk tro đei jĭ hăm yŏng jĭ SASR-Cov-2 lơ̆m ‘năr 5/9, hloh 220 ‘nu hŏk tro păng thây kô Hnam trưng teh đak rong ‘me hŏk tro kon kông apŭng Đắk R’Lấp, dêh char Dak Nông hlôi pơm kiơ̆ ăn oei hơ drô̆ tơ̆ hnam trưng vă tang găn jĭ Covid-19. Ƀok Nguyễn Văn Nam, Kơ dră chĕp kơ̆l Hnam trưng teh đak rong ‘me hŏk tro kon kông hŏk jăl 2 păng 3 apŭng Đắk R’Lấp, dêh char Dak Nông tơ băt, rim năr hnam trưng adoi jang hơ dai hăm khŭl jang pơ gang hơ len lăng hơ kâu yuh păng tơ roi tơ băt hrĕnh tơ drong jơ hngơ̆m pran kơ đe hŏk tro păng thây kô pơ tho.

“Găh kang ƀô̆, bơ ngai jang, anih sŏng sa, anih oei hnam trưng hlôi hơ met ăn 1,2 lăm bơ̆ jang păng hnam pơ tâp hơ kâu jăn ăn kơ đe thây kô pơ tho. Hăm hŏk tro ‘noh anih oei tôch kơ vei sơ đơ̆ng, đei truh 27 lăm oei đei ŭnh điên, đak tôm, chă pơ yơ̆ng, hum hơ rao hơ drô̆. Oei tơ drong sŏng sa kơ đe oh ‘noh kiơ̆ trong hŏk ƀŏng kŭm hmă nhen ƀơ̆t tam mă đei jĭ đĕch. ‘Moi kiơ̆ thây kô pơ tho vei lăng lăm ‘noh hnam trưng kŭm tơ roi tơ băt vă kơ mĕ ƀă băt păng sơ đơ̆ng jơ hngơ̆m. Lơ̆m âu hnam trưng adoi bơ ngơ̆t đĭ đơ̆ng sŏng sa, vei lăng rơ goh, pruih bơ̆n pơ gang, hơ len lăng jơ hngơ̆m jăn, tơ dăh đei ƀôh jĭ hnam trưng gô jang hơ dai hăm Anih jang pơ gang vă vei lăng ăn đe oh.”

Rim hnam trưng hŏk tơ̆ Dak Nông pơ dơh ‘mơ̆i pơ tho hŏk kơ tă tơ̆ hnam trưng

Đơ̆ng rŏng kơ chă ƀôh hŏk tro đei jĭ Covid-19, dêh char Dak Nông hlôi pơ dơh ‘mơ̆i pơ gơ̆r pơ tho hŏk kơ tă tơ̆ rim hnam trưng. Anih pơ tho pơ hrăm dêh char Dak Nông athei đĭ đăng rim jăl hŏk đơ̆ng: jăl 1, jăl 2, jăl 3, pơ tho pơ hrăm hơ nơ̆ng păng rim anih pơ tho pơ hrăm nai lơ̆m dêh char pơ dơh ‘mơ̆i tơ drong pơ tho hŏk kơ tă tơ̆ hnam trưng hŏk ăn hŏk tro đơ̆ng ‘năr 7/9 ding truh đei tơ roi tơ băt ‘nao. Hăm hnam trưng teh đak rong ‘me hŏk tro kon kông rim apŭng păng Hnam trưng jăl 3 teh đak rong ‘me hŏk tro kon kông N'Trang Lơng, pơ gơ̆r ăn kơ đe oh oei kơ tă tơ̆ hnam trưng păng athei vei lăng kơ jăp hŏk tro. Hăm hnam trưng hŏk jăl 3 Chuyên Nguyễn Chí Thanh ăn hŏk tro oei kơ tă brŏk dơ̆ng tơ̆ tơ ring păng athei đe oh pơm kiơ̆ tơ păt dôm trong jang tang găn jĭ kiơ̆ tơ drong hơ găt.

Anih vei lăng găh pơ tho pơ hrăm Dak Nông athei rim hnam trưng pơm kiơ̆ tơ păt dôm trong jang tang găn jĭ. Rim hnam trưng mơ̆ng kiơ̆ tơ drong yan âu, gô tơ lĕch jang dôm trong jang pơ tho hŏk online, pơ jao kơ phiê̆u ƀai tâp, pơ jao ƀai tâp kiơ̆ dôm grŭp lơ̆m mạng tơ pôl vă tơ gŭm hŏk tro ôn ƀai păng hŏk 1,2 tơ drong mă lăp. Anih vei lăng pơ tho pơ hrăm tơ tom jang hơ dai hăm anih jang pơ gang pơ tho hŏk tro, kang ƀô̆ thây kô pơ tho jang ‘lơ̆ng tang găn jĭ, vei sơ đơ̆ng jơ hngơ̆m pran ăn đĭ đăng thây kô pơ tho păng đe oh hŏk tro yak hloh ‘măng jĭ âu. Mă loi ‘noh hăm hŏk tro F0, đei bơ ngơ̆t truh lơ hloh, pơ lung đe oh sơ đơ̆ng đon tơ chĕng pơm kiơ̆ ‘lơ̆ng tơ drong jang tang găn jĭ. Ƀok Nguyễn Văn Toàn, Kơ dră Anih vei lăng găh pơ tho pơ hrăm dêh char Dak Nông ‘meh vă thây kô pơ tho păng đe oh hŏk tro vei lăng jơ hngơ̆m jăn, pơm kiơ̆ ‘lơ̆ng dôm trong jang tang găn jĭ kiơ̆ hơ găt vă jăh hơ lơ̆k dơ̆ng pơ tho păng hŏk pơ hrăm.

“Hrei ‘nâu Anih vei lăng găh pơ tho pơ hrăm hlôi krao điên thoăi apĭnh jet gia, pơ lung đe thây kô pơ tho sơ đơ̆ng jơ hngơ̆m oei kơ tă tơ̆ hnam trưng yua kơ dih kâu păng đe oh hŏk tro. Đe thây kô pơ tho vei lăng lăm athei hơ len lăng đe oh krao điên thoăi ăn unh hnam băt tơ drong jơ hngơ̆m jăn đe oh oei lơ̆m hnam trưng, hơ dai hăm ‘noh pơ lung unh hnam đe oh oei lơ̆m âu. Anih jang kŭm hlôi pơ gơ̆r ăn khŭl kơ dră vei lăng hnam trưng athei vei lăng đe oh veh ver tơ drong tơ poh băl lơ̆m hnam trưng.”

Găh lơ̆m cham Hnam trưng rong ‘me hŏk tro kon kông apŭng Đắk R’Lấp

Lăp đơ̆ng rŏng kơ đei hơ nih bơ ngai jĭ SARS-CoV-2 lơ̆m tơ pôl đơ̆ng 1 ‘nu hŏk tro tơ̆ xăh Quảng Tín, apŭng Đắk R’lấp, Phŏ kơ dră Anih vei lăng kon pơ lei dêh char Dak Nông Tôn Thị Ngọc Hạnh hlôi kĭ tơ chơ̆t tơ mơ̆t yua 1,2 trong jang kăl lơ̆m tang găn jĭ Covid-19 lơ̆m tơ ring. Kiơ̆ đơ̆ng noh, dêh char Dak Nông tơ chơ̆t pơ vang găn pơ đĭ apŭng Đắk R’lấp đơ̆ng 12 jơ ‘năr dơ̆ng ‘năr 7/9 păng tơ mơ̆t yua tơ păt dôm trong jang kiơ̆ tơ chơ̆t 16. Yă Võ Thị Kiều Linh, Phŏ Kơ dră anih vei lăng kon pơ lei apŭng Đắk R’Lấp tơ roi, lăp ƀơ̆t dêh char tơ mơ̆t yua tơ drong tơ chơ̆t 16, apŭng hlôi đei trong jang pơ truh phe xŏng tơ mam sa ăn kơ kon pơ lei ‘moi kiơ̆ grŭp Covid-19 tơ pôl. Dôm bơ ngai jang lơ̆m grŭp gô chă asong phe, tơ mam sa truh rim unh hnam, anih ăn oei hơ drô̆ lơ̆m noh đei hloh 220 ‘nu thây kô pơ tho, hŏk tro vă rim bơ ngai sơ đơ̆ng jơ hngơ̆m “ bu oei tơ̆ yơ ‘noh oei dơ nơ̆ng tơ̆ noh”.

“Nhôn hlôi athei Anih pơ gơ̆r tang găn jĭ kơ xăh kŭm nhen kơ apŭng athei vei sơ đơ̆ng ưh kơ lê̆ kon pơ lei hơ yơ pơ ngot, ưh kơ măh kơ chơ̆t bek ‘lơ̆ng. Nhôn iŏk tơ mam ‘măn răk hiă, tơ dăh kon pơ lei  ưh kơ măh ‘noh mă hơ drol tơ gŭm phe păng mi tôm ăn kơ rim unh hnam. Păng hơ nơ̆ng dăr hơ len dôm unh hnam dơ nuh hin, vă jê̆ dơ nuh hin, unh hnam teh đak tơ gŭm vă tơ gŭm ưh kơ lê̆ kon pơ lei đei pơ ngot.”

Khŭl vei lăng drŏ kăn apŭng Đắk R’Lấp hlôi tơ lĕch tơ drong jang ‘ chă ba tơ mam ưh kơ hoach jên” năm tơ̆ kơ chơ tơ gŭm kon pơ lei, vă kon pơ lei sơ đơ̆ng oei tơ̆ hnam tơ jră jĭ. Khŭl jang hlôi pơ jing 110 khŭl năm tơ̆ kơ chơ hăm tơ drong vang jang đơ̆ng vă jê̆ 700 ‘nu bơ ngai jang lơ̆m khŭl. Rim năr, dôm khŭl chă ba tơ mam ưh kơ hoach jên gô iŏk hla ar răt tơ mam  năm tơ̆ kơ chơ tơ gŭm rim unh hnam. Mưh pơ jao tơ mam dôm tơ mam âu ưh kơ ngôi tơ jê̆ kơ tă mă lê̆ tơ̆ ‘măng jang ăn kon pơ lei vă vei sơ đơ̆ng tơ drong hơ găt tang găn jĭ. Tơ drong jang âu gô đei Khŭl jang vei lăng drŏ kăn apŭng Đắk R’lấp pơ vei lơ̆m khei ‘năr ưh kơ ăn yak vih vơ̆t lơ̆m tơ pôl kiơ̆ tơ drong tơ chơ̆t 16..

VOV Tây Nguyên: Chih

Thuem: Tơ blơ̆