VOV4.Bahnar - Sơnăm hŏk 2021-2022, vă tơgŭm ăn hŏk tro tơnap tap đei năm hŏk, dơnŏ anĭh vei lăng pơtho pơhrăm dêh char Dak Nông hlôi jang kiơ̆ ƀơk ăn kơsơ̆p hla bơar hŏk, hla bơar chĭh păng tơgŭm kon jên hŏk pơhrăm ăn hlŏh 22.000 ‘nu hŏk tro. Kiơ̆ kơ ‘nŏh, sơnăm hŏk 2021-2022 dêh char Dak Nông đei 22.400 ‘nu hŏk tro kon kông ŭnh hnam dơnŭh, vă jê̆ dơnŭh đei ƀơk ăn kơsơ̆p hla bơar hŏk, hla bơar chĭh; lơ̆m au đei 14.300 ‘nu hŏk tro jăl kơ đĕh, hlŏh 6.900 ‘nu hŏk tro jăl ƀar păng 1.200 ‘nu hŏk tro jăl pêng. Mă hơdăh, mĭnh ‘nu ŏh sơng iŏk đei kơsơ̆p hla bơar hŏk păng hla bơar chĭh đơ̆ng 14 trŭh 24 kơsơ̆p, gômơ̆ng kiơ̆ lăm hŏk. Akŏp kon jên ƀơk ăn au vă jê̆ 11 ti hlak jên, kon jên đơ̆ng dêh char tơlĕch ăn. Atŭm hăm ‘nŏh, dêh char Dak Nông jei krao hơvơn rim khŭl, rim bơngai atŭm hăm kon pơlei lơ̆m dêh char vang chă tơra kon jên, kơsơ̆p hla bơar hŏk, hla bơar chĭh, hơbĕn ao vă tơgŭm ăn dôm hŏk tro tơnap tap, hŏk tro mơti mơtek đei năm hŏk pơhrăm.

Tơblơ̆ nơ̆r: Amazưt