VOV4.Bahnar - Dơ nŏ anih vei lăng kon pơ lei plt Gia Nghĩa (Dak Nông) ăn tơ băt, khul jang kơ pal ‘nao chă ƀôh 10 ‘nu bơ ngai đei 2 ‘nu bơ ngai huơ̆r gre chơ iŏk đơ̆ng tơ ring đei jĭ mât tơ̆ plt Gia Nghĩa mă ưh đei chih tơ roi găh jơ hngâm jăn lơ̆m gơ măng ‘năr 1/8. 10 bơ ngai âu ‘nŏh jĭ kon pơ lei kon kông đơ̆ng 18 -24 sơ năm, đei hla ar oei xa tơ̆ apŭng Lắk, dêh char Dak Lak oei brŏk jâng hŏh đơ̆ng Bình Dương.

Kơ tă lơ̆m gơ măng, 2 ‘nu bơ ngai huơ̆r gre păng 10 ‘nu bơ ngai kơ pal hlôi đei chơ năm tơ̆ anih oei hơ drô̆ hơ dai kơ plt Gia Nghĩa vă set hơ len virus SARS-Cov-2. Atŭm hăm ‘nŏh, Anih pơ gơ̆r tang găn jĭ tơ̆ bơ ngai kơ plt Gia Nghĩa athei sek tơ lang hloi 2 ‘nu bơ ngai huơ̆r gre păng gre tih đei kơ ƀang sô̆ 48C- 045.83 kiơ̆ tơ drong hơ găt, tơ dăh lê̆ đei jĭ tơ pŏh ‘nŏh athei chih hla ar sek tơ lang kiơ̆ luơ̆t. Hăm 10 ‘nu kon pơ lei Dak Lak, plt Gia Nghĩa vă jang hơ doi hăm khul kơ dră pơ gơ̆r tơ̆ tơ ring đei sư oei xa vă sek tơ lang tơ drong pơm glăi nơ̆r hơ găt tang găn jĭ Covid-19.

Dơ̆ng: Tơ blơ̆