VOV4.Bahnar - Dêh char Dak Nông hơ met ming, pơm rơ du ƀiơ̆ tơ drong pơ vang găn tơ pôl, lơ tơ ring athei pơm kiơ̆ tơ drong Tơ chơ̆t 19 dơ̆ng, pơih dơ̆ng lơ tơ drong jang xa, tĕch mơ dro, pơ vih pơ văn tơ̆ tơ ring.

Kiơ̆ hla ar đei Dơ nŏ anih vei lăng kon pơ lei dêh char Dak Nông tơ lĕch ‘năr 23/9, plt Gia Nghĩa păng 5 apŭng: Tuy Đức, Dak G’long, Dak Song, Krông Nô, Cư Jút, tơ plih đơ̆ng jang kiơ̆ tơ drong tơ chơ̆t 15 jing jang kiơ̆ tơ drong tơ chơ̆t 19. Hơ drô̆ apŭng Dak R’lấp oei jang kiơ̆ tơ drong tơ chơ̆t 15 păng apŭng Dak Mil hơ nơ̆ng jang kiơ̆ tơ drong tơ chơ̆t 16. Tơ̆ dôm tơ ring asong jang kiơ̆ tơ drong Tơ chơ̆t 19, Dơ nŏ anih vei lăng kon pơ lei dêh char asong pơih dơ̆ng anih et xa, hnam hotel, dôm tơ drong tĕch mơ dro, pơ vih pơ văn, chơ chuĕn lơ̆m dêh char. 

Nơ̆r athei hăm anih tĕch mơ dro, pơ vih pơ văn mưh bơ̆ jang dơ̆ng ‘nŏh, athei pơm kiơ̆ dôm trong jang tang găn jĭ Covid-19 đơ̆ng Anih tơm vei lăng jang pơ gang. Mă hơ dăh, ưh gơ̆h akŏm lơ hlŏh 30 ‘nu bơ ngai lơ̆m tơ pôl, ‘ngoăih kơ anih jang, hnam pơ gang, hnam hŏk. Jô̆ truh ‘năr 23/9, dêh char Dak Nông đei 697 ‘nu bơ ngai jĭ Covid-19, lơ̆m nŏh đei 253 ‘nu bơ ngai hơ met klăih, brŏk đơ̆ng hnam pơ gang bơih. 

Dơ̆ng: Tơ blơ̆