VOV4.Bahnar - Kơsơ̆ năr 15/7/2021, dêh char Dak Nông đei bơngai mă 5 tơpŏh jĭ Covid-19 ‘nŏh bơngai vơ̆r gre tĭh yak hlŏh dêh char. Bơngai jĭ dŏ nglo 40924 ‘nŏh V.H.L.E, rơnĕh sơnăm 1991, oei tơ̆ thôn Mỹ Long, tơring Mỹ An, apŭng Chợ Mới, dêh char An Giang. Mư̆h yak hlŏh Dak Nông bơngai au ‘mĕh vă khăm hơlen hăm test rĕnh păng đei ƀô̆h tơpŏh yŏng jĭ SARS-CoV-2 lơ̆m 9jơ15’ năr 15/7/2021. Hnam pơgang hlôi iŏk pham bơngai jĭ au pơtrŭh ăn Anĭh tơm dăr lăng jĭ jăng dêh char khăm hơlen hăm trong khăm kiơ̆ kĭh thuơ̆t RT-PCR păng đei ƀô̆h tơpŏh jĭ lơ̆m 4 jơ 45 pơnĭt kơsơ̆ năr ‘nŏh hloi. Bơngai jĭ hlôi đei chơ hnăm gre pơgang năm tơ̆ hơnĭh ăn oei hơdrô̆ ming hơmet jĭ Covid-19 kơ dêh char. Lăp đơ̆ng rŏng ƀô̆h đei jĭ, khŭl jang hlôi năm tơchă rim bơngai oei tơ jê̆ vă iŏk pham khăm hơlen. Hơnĭh jang pơgang jei hlôi pruih pơgang pơlôch sơmach jĭ pơ đĭ hơnĭh gak tang găn Cai Chanh păng hơnĭh khăm test rĕnh kơ Hnam pơgang apŭng Dak Rlâp.

Tơblơ̆ nơ̆r: Amazưt