VOV4.Bahnar - Năr 12/7, dêh char Dak Nông hơnơ̆ng đei bơngai tơpŏh sơmach jĭ SARS-Cov-2 ‘nao brŏk đơ̆ng pơlei tơm Hồ Chí Minh. Bơngai jĭ 31604 ‘nŏh mŏ C.T.Q, rơnĕh sơnăm 1966, oei tơ̆ tơring Dak Wer, apŭng Dak Rlâp, dêh char Dak Nông. Kiơ̆ hơlen pơrang jĭ, dang 3 jơ pơgê năr 8/7, mŏ Q mơng gre pơgang chơ klo mŏ ‘nŏh P.T.T, rơnĕh sơnăm 1962, năm hơmet jĭ tơ̆ Hnam pơgang Bình Dân (371 Điện Biên Phủ, phương 4, quận 3, Pơlei tơm Hồ Chí Minh). 

Khŭl jang pơgang hơnhăk bơngai jĭ năm oei tơ̆ hơnĭh oei hơdrô̆

Tơ̆ hnam pơgang pơ đĭ klo akăn đei khăm Test rĕnh ư̆h kơ đei ƀô̆h tơpŏh jĭ Covid-19. Trŭh 9 jơ gơmăng năr ‘nŏh hloi, mŏ Q mơng gre pơgang chơ klo vĭh (tim mă băt hơdăh gre pơgang păng bơngai vơ̆r gre au). Pơgê năr 9/7, mŏ  Q. năm tơ̆ Hnam pơgang tơring Dak Wer tơroi tơbăt jơhngơ̆m jăn păng ăn oei hơdrô̆ lơ̆m hnam. 11 jơ 30 pơnĭt gơmăng năr 11/7. Hơnĭh tơm dăr lăng pơrang jĭ dêh char Dak Nông đei băt mŏ Q đei tơpŏh sơmach jĭ SARS-Cov-2. Lơ̆m gơmăng ‘nŏh hloi, khŭl ƀok thây pơgang dêh char Dak Nông hlôi chơ ba mŏ Q năm oei hơdrô̆, iŏk khăm hơlen pham trŭh 10 jơ năr 12/7 băt hơdăh khăm hơlen RT-PCR ƀô̆h hơdăh mŏ Q đei tơpŏh jĭ Covid-19. Lơ lŏh trŭh kơsơ̆ năr 12/7, dêh char Dak Nông hlôi đei 3 ‘nu bơngai tơpŏh jĭ Covid-19, jei dôm bơngai brŏk đơ̆ng pơlei tơm Hồ Chí Minh ngăl. Lăp đơ̆ng rŏng hơnơ̆ng đei bơngai tơpŏh sơmach jĭ SARS-Cov-2 brŏk đơ̆ng pơlei tơm Hồ Chí Minh, dêh char Dak Nông hlôi chĭh tơlĕch nơ̆r tơchơ̆t pơtho tơbăt sơng iŏk, khăm hơlen 3 ‘măng hăm rim bơngai brŏk đơ̆ng pơlei tơm Hồ Chí Minh vă tang găn jĭ Covid-19. 

Tơblơ̆ nơ̆r: Amazưt