VOV4.Bahnar - Truh 19/11, dêh char Dak Nông ƀet đang jrŭm 1 păng dang 36% jrŭm 2 vaccine tang găn jĭ covid-19 ăn đĭ đăng kon pơ lei đơ̆ng 18 sơ năm tŏk tơ̆ kơ pal. Anih vei lăng tơ drong jĭ jăn dêh char Dak Nông (CDC Dak Nông) roi tơ băt, lơ̆m dêh char đei dang 445.000 ‘nu bơ ngai kơ pal kơ 18 sơ năm đei tôm tơ drong kăl gơ̆h ƀet vaccine tang găn jĭ Covid - 19.

Dak Nông hơ tŏk hrĕnh tơ drong ƀet jrŭm 2 vaccine tang găn jĭ Covih-19 ăn bơ ngai đơ̆ng 18 sơ năm tŏk tơ̆ kơ pal

Truh ‘năr 19/11, Dak Nông sơng iŏk đei hlŏh 708.600 kơ liêu vaccine dôm kơ loăi Astra Zeneca, Pfizer, Moderna, Vero Cell đơ̆ng Anih tơm vei lăng jang pơ gang păng đĭ ƀet đei vă jê̆ 587.600 kơ liêu, hlôi ƀet đang jrŭm 1 ăn đĭ đăng bơ ngai kơ pal kơ 18 sơ năm, păng ƀet jrŭm 2 đei 36%. Hlŏh 120.000 kơ liêu oei đei dơ̆ng vă adrin ƀet pơ đĭ ăn dôm tơ ring lơ̆m dêh char. Lơ̆m gĭeng âu, tơ dăh iŏk đei dơ̆ng hlŏh 181.000 kơ liêu vaccine đơ̆ng Anih tơm vei lăng jang pơ gang, pơ hlŏm năng truh đĭ khei 11 âu dêh char vă ƀet vaccine jrŭm 2 ăn bơ ngai kơ pal kơ 18 sơ năm đei 65%, păng ƀet tôm ăn đĭ đăng bơ ngai ƀât tŏk bŏk khei 12 truh.

Dơ̆ng: Tơ blơ̆