VOV4.Bahnar - Bơ̆ jang tơ drong jang “Đĭ đăng kon pơ lei vang tang găn jĭ Covid-19 păng bơ ngai mât lĕch glăi luơ̆t” tơ̆ tơ ring sơ lam, dôm khul linh ƀô đô̆i vei lăng tơ ring sơ lam dêh char Dak Nông jang hơ doi hăm tơ ring pơ gơ̆r tơ roi tơ băt, krao hơ vơn đei hlŏh 1000 unh hnam kon pơ lei arih xa tơ̆ tơ ring sơ lam dêh char pơm hla ar pơ kăp vang tang găn jĭ Covid-19 păng bơ ngai mât lĕch glăi luơ̆t.

Kŭm hăm pơm hla ar pơ kăp bơ̆ jang kiơ̆ dôm trong tang găn jĭ kiơ̆ nơ̆r athei đơ̆ng khul kơ dră tơ ring, mưh ƀôh bơ ngai mât lĕch glăi luơ̆t dăh mă bơ ngai đơ̆ng tơ ring đei jĭ truh, kon pơ lei năm tơ roi hloi ăn khul kơ dră tơ ring, khul linh vei lăng tơ ring sơ lam băt. Kon pơ lei vă bơ̆ jang kiơ̆ 3 ưh: ưh đei mât lĕch glăi luơ̆t; ưh đei ôn, tơ gŭm ăn bơ ngai mât lĕch glăi luơ̆t; ưh đei pơ gơ̆r sơng, chông trong ăn bơ ngai mât lĕch glăi luơ̆t.

Dơ̆ng: Tơ blơ̆