VOV4.Bahnar - Kiơ̆ trong vă jang, sơ năm 2021, dêh char Dak Nông tơ lĕch 172 ti hlak jên vă chô̆ hơ met pơ ‘lơ̆ng tơ lei unh điên pơ yoa ăn kon pơ lei, lơ̆m nŏh đei 24 tơ drong jang vă iŏk jang pơ toi dơ̆ng đơ̆ng sơ năm sơ̆, 35 tơ drong jang ‘nao.

Truh đĭ khei 4, Công ty jang unh điên Dak Nông hlôi tơ lĕch hlŏh 14 ti hlak jên bơih. Vă hơ tŏk hrĕnh tơ drong jang, Công ty athei dôm anih jang đei ƀơm truh vang roi tơ ƀôh mă tơ tom tơ drong pơ gơ̆r hơ len năng, kĭ ăn tơ drong jang; tơ lĕch trong hơ met ming, jên vă jang… tơ̆ dôm tơ drong jang, atŭm hăm ‘nŏh vei lăng kơ jăp tơ drong bơ̆ jang vă gơ̆h ‘lơ̆ng kơ jăp, lăp hăm khei ‘năr hơ găt.

Tơ drong kơ chăng pơ jing trong jang, jăh tơ mât yoa dôm tơ drong jang unh điên âu ưh lăp hơ nhăk tơ drong đei yoa găh mŭk drăm đĕch mă oei pơ vih ‘lơ̆ng ăn tơ drong jang atŏk tơ iung mŭk drăm, tơ pôl, pơm hơ tŏk tơ drong arih xa ăn kon pơ lei dêh char Dak Nông hai.

Dơ̆ng: Tơ blơ̆