VOV4.Bahnar - Vă vei lăng sơ đơ̆ng chinh trĭ, sơ đơ̆ng lơ̆m tơ pôl ƀât năr pôk rơih Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring đơ̆ng 2021-2026, Công an dêh char Dak Nông hlôi tơ lĕch păng pơ gơ̆r bơ̆ jang kiơ̆ lơ trong jang vei lăng sơ đơ̆ng.

Công an dêh char Dak Nông pơ gơ̆r bơ̆ jang vei lăng ‘lơ̆ng tơ drong sơ đơ̆ng

Kiơ̆ kơ ‘nŏh, Công an dêh char Dak Nông hơ tŏk khul linh jur jang tơ̆ tơ ring vă gơ̆h băt hơ dăh rim tơ drong, tơ lĕch trong bơ̆ jang, roi tơ băt, krao hơ vơn kon pơ lei bơ̆ jang ‘lơ̆ng kiơ̆ trong jang đơ̆ng Đảng, khôi luơ̆t tĕh đak, vang năm pôk rơih; tơ tom chă ƀôh păng tang găn rim tơ drong phă ngơ̆r đơ̆ng khul hơ yăt ‘mĕh phă hŭt tơ drong pôk rơih Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring.

Công an dôm tơ ring pơih lơ tơ drong jang tơm vă tang găn dôm tơ drong yoch tih, tơ drong yoch găh mŭk drăm, ma túy, hơ tŏk tơ drong vei lăng sơ đơ̆ng tơ pôl, hơ nơ̆ng hơ len năng măt bơ ngai lơ̆m rim unh hnam, hơ len năng bơ ngai truh oei pơ gia.

Dơ̆ng: Tơ blơ̆