VOV4.Bahnar - Truh dang ei, lơ̆m dêh char Dak Nông hlôi hơ tŏk tơ iung đei 230 hơp tak xăh, hăm hloh 18.000 ‘nu bơ ngai jang. Kiơ̆ hơ len lăng đơ̆ng Anih vei lăng kon pơ lei dêh char Dak Nông, rim hơp tak xăh hlôi tơ plih tơ drong jang bơ̆ jang kiơ̆ Luơ̆t hơp tak xăh 2012 adoi đei hơ yak tơ plih ‘nao, roi ‘năr roi pơ̆ih să păng hơ tŏk tơ iung, tơ gop tơ plih um ai tơ ring tơ rang. Sơ năm 2021, thu iŏk jô̆ păh lăp đơ̆ng rim hơp tak xăh tơ̆ Dak Nông đei vă jê̆ 1,5 ti hlak jên, chă ăn tơ drong jang hơ nơ̆ng ăn kơ vă jê̆ 4000 ‘nu jang hăm jên iŏk yua jô̆ păh lăp 70 triệu hlak jên 1 ‘nu.

Mă loi ‘noh jĭ lơ̆m tơ drong choh jang sa, rim hơp tak xăh tŏk bŏk jing anih tơm lơ̆m vă jang pơ jing rim tơ ring choh jang sa tơ mơ̆t yua kơ măy kơ mŏk ‘nao kơ dêh char, jang hơ dai akŏm kon pơ lei jang chŭn mir pơm tơ lĕch kiơ̆ trong kơ jă lơ. Dêh char hlôi pơ jing 8 tơ ring pơm tơ lĕch choh jang sa tơ mơ̆t yua kơ măy kơ mŏk ‘nao; hlôi đei 12 tơ mam đơ̆ng hơp tak xăh iŏk đei pơ kăp ‘lơ̆ng 3-4 hơ nglŏng lơ̆m tơ drong jang 1 xăh 1 tơ mam (OCOP), đei tĕch tơ lĕch truh tơ̆ anih tĕch mơ dro tôch hơ len nhen Châu Âu.

Thuem: Tơ blơ̆